السبت، كانون الثاني 15، 2011

شو الوطن؟

لو يسألوني شو الوطن
رح رد ما بعرف
عن جد ما بعرف
لا كيف، وين، وليش
كلِّ البعرفو ضوّ وِمْوَيّ ومِلِح
بِمْرارتي انخلطوا سوا
ونزّوا مِنِ عْيوني دمع

عندي الوطن إيمان جوّاتي
متل العشق
بيني وبين حالي
حبّة حلو بيستطعما لساني
عندي الوطن سكنة طفل غفيان
هلق صرت بعرف بهالغربة لشو
كل ما شفت إبني المسا غفيان
بيعنّ ع بالي البكي

بيطلع ع بالي بوّس عيونو
وبحضني هدهدلو
مرمغ حنيني بموج شعراتو
ومن غير سبب
يطلع ع بالي غيّر تيابو العتيقة وإنعجق قبل الوقت
إركض ت حضّرلو تياب العيد

شو صار ت بحبّك أنا هالقدّ
ليش ت أنا الداشر متل شتلة بنص الريح
ما بفوت ما بطلع
شي موصَّل شروشي بأنين البين
ساقي الحلم من وشوشات نجوم مطفيّة
متعلّق بخيطان ما بتنشاف
ومن غير سما بتلملمِ جْروحي
لامم تحت جرحي السما