هالكون ما تغير

عا قدَ ما تغير

هالكون ما تغير

إساتها جديدة القصص

وبنسمعا

بعيوننا الدهشة

بقلوبنا رعشة

بس الملك هوَي الملك

والعبد اساتو عبد

واللي بعت بالماضي خيَال الظلم

يسرق صبايا من الكرم

ألله بعتلو اليوم نافورة عتم

ت يشتري فيها بشر

بالنار والدينار

واللي انخلق

لما انخلق

ت يخدم الأحرار

مفطور قلبو ع الوفا

شقَ البحر

هدَ الصخر

ودَى الرسالة

وانطفى

تعي

طول عليي الليل يا شمس ارجعي ....... مقلوع قلبي من الشرش ما نو معي
هالعايشو مو شوق مو حزن وأسى ........ ولا بينحكى بكلمات يحكمها وعي
واصل ع حفة موت باقيلي شبر........... بوقع إذا ما إيدك انمدت..........تعي

رسالة من باسل

باسل، ابن عائلة لبنانية مغتربة، طفل عمره سبع سنوات، خرج من بارانا - البرازيل ليقضي الصيف في ضيعته الجنوبية التي طالما حدثه أهله عنها، في زيارة لأقرباء له، فكان أن حصدت جسده الطاهر آلة العدوان الآثمة

طِلِعْ مَظبوط يا بيّي

مِتِلْ ما كنْت تحكيلي عنِ بْلادي

"عنِ التلة وْعنِ الوادي"

عنِ الْجنة

عنِ عْصافير عَ الشبّاك بِتْغني

عنِ تْرابِ الْعِطِرْ والطيب

"عنِ الشَّمس اللي ما بتغيب"

طِلِعْ مَظبوط يا بيّي

متلْ ما حْكيت.. بسِّ نْسيت تحكيلي

عنِ المَرْجوحة ياللي مْعلّقة بالغيم

عنِ جْوانح رسمْها الضوّ عَ كتافي

عنِ جرار العَسل بتْشرّ ع شْفافي

عنِ الدّنْيي اللي ما فيها بشرْ تِكْره

يا بيّي بعْرفِ بْتزْعل

إذا بلاقي - من بلادي - بلد أحلى

ما فيّي اليوم ما قلك:

ع قدّ بْلادي مو حلوة

أنا لقيت السّما أحلى

ما في طريق

ما في طريق
لمّا إنِتْ تمشي
خطواتك بتخلق طريق
من قبلا ما في شي
لا في نجوم ولا قمر
لا حتى في دروب وطريق

بتوقّف بتتطلّع بماضي وراك
بتشوف شو في دروب ما مشيتا
لا عاد تمشيّا
ولالك دخّل فيها
من غير خطواتك إنت
لا في طريق ولا نجوم ولا قمر
وغير الزبد هالموج مو تارك أتر

ما عد حمل قلبي

ما عدْ حِمِلْ قلبي
غربة ع هالغربة
بدّو ت تهْدى جْوانْحو بسِّ الدَّرِبْ صعبة

***

متعوّد -وكفّي النّدى- إسقي الزّرِع
إتسابق جموح المدى بْجانح شَمِع
خلِّي الشمس جنبي
تسمعني وتلبّي
تنزلْ برِدْ ع جْوانْحِي وتعطِّرا مْحبّة

***

بكرا بسما غير السما رح برتمي
والرحلة ترجع ترسما مواسم طمي
غربة بعد غربة
ما بتهدى يا دربي
جايي ع بالي غطّ بسِّ مْزاري متخبّي

***

ما عدْ حِمِلْ قلبي
غربة ع هالغربة
مشتاقة تهْدى جْوانحو بسِّ الدَّرِبْ صعبة

***

يا بلادي يا سمرة

يا بْلادي بدّي غنيلك
باقة بنفسج نقيلك
إرجع طفل وبدحبيلك
ت فيكي إتمرّى
يا بْلادي يا سمرة

***

قارة النبك دير عطية
طلعوا عراضة شامية
حلواية كانت منسية
غنوا فرح عمرا
يا بْلادي يا سمرة

***

زيتونة الغوطة بتحكي
ت خيتا تسمع ببملكة
يلا سوا نخلي الدبكة
تطرح أرض خضرا
يا بْلادي يا سمرة

***

بحمص القلب تارك بسمة
ذكرى متل رقّ النسمة
بأحلى الصور عم ترتسمي
إم ونهر صدرا
يا بْلادي يا سمرة

***

سامع عنين الناعورة
عم تشكي بركي بنزورا
حزن اللي عربش ع زهورا
ما دبّل الزهرة
يا بْلادي يا سمرة

***

خدني معك على راس العين
حيي الميادين وعفرين
قلبي بحلب حبّ التنتين
شقرا بجنب سمرة
يا بْلادي يا سمرة

***

غنى الفرات بدير الزور
من شوقو ت يلاقي الخابور
بجسر الشغور الحب زهور
فتح ع المْعرة
يا بْلادي يا سمرة

***

تدمر عروس الصحرا تبوح
عن الغزال الأضنى الروح
والبوكمال بعطرا تفوح
قهوة عرب مرّة
يا بلادي يا سمرة

***

غنيلي درعا وسويدا
ودندن ع هالنغمة وعيدا
مهما وصفتا ما بزيدا
كلاّ سحر بصرى
يا بْلادي يا سمرة

***

ع اللاذقية وديني
جبلة ع غفلة تلاقيني
قضي مع صحاب سنيني
بشط البحر سهرة
يا بْلادي يا سمرة

***

غصّة ألم شو خبيتا
يوم الوداع بصافيتا
والدمعة بيي ما نسيتا
لو طالت السفرة
يا بْلادي يا سمرة

***

هيك الشآم بلاد النور
مهما الرياح عليها تجور
ما بينكسر عرق المنتور
ولا بتنطفي الجمرة
يا بْلادي يا سمرة

***

أمسية شعرية

شاركت في أمسية شعرية يوم الأربعاء في العاشر من تشرين الأول، في المركز الثقافي العربي في ساو باولو، حيث ألقيت بعض قصائدي بالعامية.