الجمعة، تشرين الأول 28، 2005

حب عابر

كانِ الْعِشِق يَوْما مْعَذّبْني قاطِعْ عَنِ وْراقي الْهَوا وِالضّو جيتي بْطريقي بْنَفْسَجة وِمْتَوَّجة بالشَّوْك أيّا طريقٍ لْ وَصَّلِك عَ جْنَيْنِةِ جْروحي؟ أيّا حنينِ لْ سلَّمِكْ روحي؟ مِنْ عَلَّمِك.. مِنْ وَصَّلِكْ عِنْدي؟ أيّا زَهِر.. أيّا عِطِر.. أيّا رَوايحْ هيل وَدّوكي؟ ت غفيتي ع زندي عم بسأل وبعرف مَ رَحْ أعْرِف بَسِّ لْ بَعِرْفو اللّيل مِنْ وَقْتا انْدلق عبّا الْفَجِر كاسات من خَمْري وبنار من جَمْرِ الهوى دوّب - ولو نتفة - تَلِجْ عِمْري

الثلاثاء، تشرين الأول 25، 2005

مجبور يومي بالأمل

كنا م نستنّى العشب جابوا الحرب كنا م نستنّى الشتي جابوا الطمي يبّس صِدِرْ عِشتار تمّوز انْخصى هدّوا الجِسِر زتّوا الحِلِم بالبير نحْروا اللي جرَّب ينْتِخِي يرخي الحَبِلْ هِرْبت غيوم مخصّبة.. سدّوا السما ما عاد في مَنفد متل الفرس هربانه صرنا بْلا طريق وْلا مدى حتى إذا مرّات نتلفّت ورا ما في حدا
إلا كَلِب جربان م يفتّش ع عضمة بالخراب شي فتّحوا بواب السِّجِن هجّت بشر.. فاتت بشر نفْس الوجوه الكالحة ونفس السراب شي فتّحوا بواب الوطن فاتت بشر.. هجّت بشر شي فتّحوا بواب الإله تْبَهدلوا الضّحكات ع شفاف الرباب وتزنّرت سالومي بالساطور والعفّة صفّت مسافات النفي أكبر
...
...
... بس الحقيقة الباقية بتضل إني أنا بقيان إتْلاقى بْبَشَر متلي في عندون وعندي أمل ت نعيش أو ت نموت حتى نعيش

السبت، تشرين الأول 22، 2005

هجرة

في شي غلط كِلْشي غلط يِمْكِنْ بسِّ الْغلط فوق الغلط خلاّني لاقي الصحّ خلاّني أعرف ليشْ جِلْجامِشْ سَلَكْ درْبِ الْعَتِم تَ بْقلبو لاقى الضوّ إنتي بتعرفيني إذا بدّي لَبَنْ عَصْفور رَحْ لاقي وقت الْ مَ بدّي موت رح بِبْقى، وْأنا باقي لكن إذا بلّش حنين الغيم ينساني وِتْحَرْطَموا مْواجي ع صخْرات الصَّبِرْ ما ضلّ ع كْمامي عِطِرْ وقتا رَحِ بْقلِّك خلص ما عاد بقّى بهالعُمِرْ إيّام تستاهل غلط *** طيِّب إذا إنتي مَ عد بدِّك حدا حدِّك حتى اللّي كانوا يصابِروا قدِّك.. مَ عَدْ بدِّك شو بسوّي بِشْروشي لَكَنْ شو بِعْمُلِ بْكفّي اللي ما لاقت قمِح شو بعْمُلِ بْدمِّي اللي ما لاقى جرِح شو بعمل بليلي اللي ما لاقى الصِّبِح مو باقي إلاّ صوت دعْساتي لآخرْ هالعَتِم ماشي ع ضوّ نْجوم ذاكرْتي صفِّط صُوَرْ وِذْنوب ومشاوير وِعْيون مَ تْشتّي *** حزني أنا بهالليل من حزنك خوفي مِتِل خوفك نبضي صدى نبضِك سامع أنين الريح ع بْوابي شفتي إذا ما تْسَكَّرِ الشِّباك ع الآخر كيف الهوا بيئِنّ ع طْرافو متل الولد ياللي انسرق منّو الفرح صفّي نهر مالو أرض، مالو سما، مالو حدا حتى الحضن، بعدو الحضن، بعدو الحضن يِصْفى صَخِرْ داشر بِهالنهر اللي ما بيعرف مدى

الأربعاء، تشرين الأول 12، 2005

ورق

قِـلــتــي: خــلـــص كلشي انكتب بيناتنا ماضي ومرق كل اللـي باقـي هلّق شويّة ورق
رح إحرقون
ونشـرتـي مـوتـي ع الــورق مــن يومـتـا قلـبـي احـتـرق وبـمـطـرحـو اتـعـبّــى ورق

الاثنين، تشرين الأول 10، 2005

يا شامة دليني ع طريق الشام

يا شامة دلّيني .... عَ طَريق الشّام
عَ تْرابا ودّيني ... أَحْلى مْنِ الأحلام
***
رِدّيني لَزْهوري .... لَعْصافير الدّوري
لاقي الوَرْدِ الجوري .... إشكيلو الإيّام
***
ردّيلي الزَّيْتونة .... وِوْراق اللَّيْمونة
هالشَّوْقِ البِعْيوني ... غَنّيلو تَ يْنام
***
زادوا سْنينِ فـْراقي ... وما بَعْرِفْ شو باقي
حتّى إِرْجَعْ لاقي ... أَحْبابي يا شــــــــــــام
***
يا شامة دلّيني .... عَ طَريق الشّام عَ تْرابا ودّيني ... أَحْلى مْنِ الأحلام
***