الثلاثاء، تشرين الثاني 29، 2005

وِبْتِرْجَعِي

وَقْتِ الْ ما بِتْكوني مَعي ضَلِّ النَّهارِ بْمَطْرَحو أوْ غابِ مَا بْتِفْرُقْ مَعي كلِّ الدَّقَايِقْ وِالْحَقَايِقْ وِالأَماكِنْ وِالطُّرُقْ برَّه الوَعي كلّ اللي تارِكْلي النَّبِِضْ عِشْقي إِلِكْ بَسِّ العِشِقْ وَحْدو ما بيْكفِّي.. ما بيدفِّي.. ما بيرِدِّ البَرِدْ بَدِّي بجِسْمي تضّيْع ديّاتِكْ بدِّي عَ صِدْرِيْ تْموتْ نّهْداتِكْ إِرْجَعْلِكِ، تْكوني مَعي وَقْتا مِتِلْ رَجْعِةْ ربيعِ بْتِرْجَعي عَ شْفافي بيْفتِّحْ زَهِر عَ زْنودي بيْمَشْوِرْ عِطِر بيْجِنِّ عَنْقودِ العِنِبْ تَ بْكَفِّكِ يْبَلِّشْ عِمِرْ عم تسْمَعي؟ عم تسمعي؟ كلاّ عَصِرْ بيْطيْبِ بِجْرارو الْخَمِرْ بِرْجَعْ لَشِلاّلْ السِّحِرْ وِبْتِرْجَعِي

الجمعة، تشرين الثاني 11، 2005

الحب الأول

بِتْذكّرو هاكِ الْمَسا، مِتْل الْ كَإِنّي عَايْشو هَلّق لَمِّن قَبِلْ ما يْبَيَّنوا النجمات بيّنتي نجمة وحيدة بالسَّما وِمْزَوْزَغِ عْيوني النَّهارِ، وْدَوْبْني شِفْتِكْ كِلِّكْ خَجَلْ عَ الباب وِقَّفْتي دِقّيْتي ع بْوابِ الحِلِمْ، فِتّي دِيّاتِكِ انْمَدّوا عَ حِزْني فَتَّحوا قْفال اللِّغِزْ فَكّوا قَميصِكْ عَ الْهَدا وِ تْفَرْفَطوا الأَسْرار عَ تَخْتي يَوْمَا ما بَعْرِفْ كيف ديّاتِك مَ تِرْجُفْ حَلْحَلوا لْساني ْعَ مَغْزَلِكْ هالماحَدا غَيْري أنا شافو غْزَلْتيلي مِنْ خَوْفِكْ عِمِرْ تاني صِرْتِ الصَّبي اللي بْيِعْشَقِ وْبيحِنّ إِضْحَكْ لَزَهْرِ النَّرْجِسِ وْ زَيِّنْ قَمِيْصي، وْدَفْتَريْ، وْإِسْتَنْظَرِ النِّجْماتْ لمّّن إِجُوا دوَّرْتْ ما لْقَيْتِكْ مِدْرِي انْطَفَيْتي، أو أنا بِبْنامي خِبَّيْتِكْ

الجمعة، تشرين الثاني 04، 2005

حُبّي إِلِكْ

حُبّي إِلِكْ ما غطّ عَ غَفْلة زَقْزق ع شبّاكِك فَتَحْ، قَرَّب قَطَفْ نَقطة عسَلْ مِتْل الْ لَمَحْ خَلْفِكْ قَفَص، غَيَّرْ طريقو وْ غاب جاهِ الشِّتي، هَدّى وْرِجِعْ لاقى المدى عم يتِّسِعْ
حُبّي إِلِكْ صَفّى فَرَاشِة ضَوّْ شَدّو الجَمِرْ، رَفْرفْ تَ حَرْوَقْ جانِحو وَقْتا عِرِفْ ما بْتِنْجدو إلاّ أَيادي الغَيْب آمَنْ بِآلِهْةِ العِشِق، مَدُّوا أَصَابِع مِنْ عِمِرْ عَ الْخُنْصُرِ اتْدّحْرَجْ زََهِرْ
حُبّي إِلِكْ ضَبْضَبْ دَوَاوينِ الشِّعِرْ خَبّى الوَتَرْ تَحْتِ الصَّخِرْ بَحْبَشْ عَ قَمْحات الشِّتي ، زقُّون إِلِك حبِّة ورا حبِّة لمَّا تِعِبْ نَادَاكي تَ تْضِمِّي الجِرِحْ لاقاكي مَ تْزِقِّي الْقَمِحْ
حُبّي إِلِكْ ملاّ الحِرِشْ غِزْلانْ عِطشانة تِسْقيه بِعْيونا طُمُوحُِ وْدَمّ إيْدو عَ قَلْبو عْلَيْها مِنْ دِيب الْعَطَشْ والجوعْ قَرَّبْ عَ نَبْع الميّ تَ يْعبّي
بْقَلْبو لَمَحْ في ديب مِتْخَبّي
حُبّي إِلِكْ ما كان فيه يْعيش لَوما الشِّعر مَ يْرِدّ لَجْناحو الفَضَا حُبّي إِلِكْ هوِّي أَنا، عَصْفور وِفْراشة وْنَمِلْ حتّى انْ قََلََبْ وَقْتِ الْمَعَارِكْ ديب بْصِدْرِك ع آخِر هَالْمَسَا بيْطيب

الأربعاء، تشرين الثاني 02، 2005

بيمرق عليّي العيد

بيمرق عليي العيـد صوتي منجرح.......ما في حدا ت عايدو إلا الصدى ما في أهل عدّون ع صابيعي الصبح......ت يكمّـلوا خرجيتي ورد وندى لا وْشوش تضحك ضحكتا بلون القمح...لا قْـلوب تتصافى وأماني تنهدى بْنشقى بهالغربة تَ نِتْلاقى الفـرح.......لمّـا بْيِجي يوم الفرح ما في حـدا يا ريت لو إرجع طفل عمري هني......وكل الْ جنيتو يروح يدريه المدى

الثلاثاء، تشرين الثاني 01، 2005

حب من طرف واحد

شو همّ لو حبيت ماانْحبيت نفس العِطِرْ بالليل بيسافر نفس الوَتَرْ مَشْدود ع الآخر شي تِلْمِسو بيْجِنّ بيرَتِّل شِعِر نفس القَصَبْ مَبْحوح ما بْتعرفْ كنّو مَ يشكي للقَدَرْ ولاّ مَ يستَقْبِلْ مَطَرْ يِمْكِن إذا بِزْعَل عَ شي إنّك إِنِتْ برّات هالجنّة ما تحسّ شو عم حسّ إنك ما تِسْتَطْعِمْ مَعي هالسِّكَّر الرّشّو الهوى ع شْفاف إيّامي إنك ما تَعْرِفْ يا قَمَرْ شو بْشوف بِبْنامي كَنّك ما دِقْتِ الحبّ بِدعيلك بِنَارِ العِشْق روحك حَرَام تْضَلّ بردانة وقتا إذا بْتنحَبّ.. ما بْتِنْحبّ صدّق يا أغلى الناس ما في فَرْق