السبت، كانون الثاني ١٥، ٢٠١١

شو الوطن؟

لو يسألوني شو الوطن
رح رد ما بعرف
عن جد ما بعرف
لا كيف، وين، وليش
كلِّ البعرفو ضوّ وِمْوَيّ ومِلِح
بِمْرارتي انخلطوا سوا
ونزّوا مِنِ عْيوني دمع

عندي الوطن إيمان جوّاتي
متل العشق
بيني وبين حالي
حبّة حلو بيستطعما لساني
عندي الوطن سكنة طفل غفيان
هلق صرت بعرف بهالغربة لشو
كل ما شفت إبني المسا غفيان
بيعنّ ع بالي البكي

بيطلع ع بالي بوّس عيونو
وبحضني هدهدلو
مرمغ حنيني بموج شعراتو
ومن غير سبب
يطلع ع بالي غيّر تيابو العتيقة وإنعجق قبل الوقت
إركض ت حضّرلو تياب العيد

شو صار ت بحبّك أنا هالقدّ
ليش ت أنا الداشر متل شتلة بنص الريح
ما بفوت ما بطلع
شي موصَّل شروشي بأنين البين
ساقي الحلم من وشوشات نجوم مطفيّة
متعلّق بخيطان ما بتنشاف
ومن غير سما بتلملمِ جْروحي
لامم تحت جرحي السما

هناك ٣ تعليقات:

Amr Faham يقول...

جميل....

غير معرف يقول...

Very cool design! Useful information. Go on! »

Unknown يقول...

الوطن عندى يعنى مصـــــــــــــــر . تدوينه رائعه احييك عليها وياريت تشرفنى فى مدونتى نصائح للمدونين يمكن تفيدك فى تطوير مهاراتك التدوينيه.