برّات البيوت

رباعيات الصدى

2011-04-10T16:10:00.001-02:00

مطرح مَ عبوا طراب ديّاتك

مطرح مَ حاك اللون كلماتك

مطرح مَ كنت تعفّرِ مْواويل

صفّى الصدى واللوّ رفقاتك

***

عْصَرت الفِكِر والفكْر ما خانك

كلمة صِدِق نبعت على لسانك

بس العتم لبّس كلامك طوق

من لون ظلمو ومنطقو، وهانك

***

تاني عتم قال الحَرِف مدفوع

طلّع حِقِد موتور ينزف جوع

نابو المَ قادر ع القوي يقوى

ردّ الفًرِق من صوتك الموجوع

***

بين الضَّبِع والضبْع شو تحكي

ظاهر عداوة والأصل شركة

وإنت ال يَ ويلك لو نطقت الحق

شدّ الغطا، أحسن لك، وإبكي

***

صوت النحيب يفيّق جموحك

تصْرُخ بصحرا ميِّتا جروحك

تركض على الحيطان تشكيلا

شو فهَّم الصخر بْوَجَع روحك؟

***

ماشي على السكين قضّي العمر

حولك أيادي السوّ، تحتك جمر

نْ وِقْع الوَرِد، يَ بتاكلو النيران

يَ بْتسرُقُوا لوْحوش، مُرّ بمُرّ

شو الوطن؟

2011-01-15T13:13:00.004-02:00

لو يسألوني شو الوطن
رح رد ما بعرف
عن جد ما بعرف
لا كيف، وين، وليش
كلِّ البعرفو ضوّ وِمْوَيّ ومِلِح
بِمْرارتي انخلطوا سوا
ونزّوا مِنِ عْيوني دمع

عندي الوطن إيمان جوّاتي
متل العشق
بيني وبين حالي
حبّة حلو بيستطعما لساني
عندي الوطن سكنة طفل غفيان
هلق صرت بعرف بهالغربة لشو
كل ما شفت إبني المسا غفيان
بيعنّ ع بالي البكي

بيطلع ع بالي بوّس عيونو
وبحضني هدهدلو
مرمغ حنيني بموج شعراتو
ومن غير سبب
يطلع ع بالي غيّر تيابو العتيقة وإنعجق قبل الوقت
إركض ت حضّرلو تياب العيد

شو صار ت بحبّك أنا هالقدّ
ليش ت أنا الداشر متل شتلة بنص الريح
ما بفوت ما بطلع
شي موصَّل شروشي بأنين البين
ساقي الحلم من وشوشات نجوم مطفيّة
متعلّق بخيطان ما بتنشاف
ومن غير سما بتلملمِ جْروحي
لامم تحت جرحي السما

بحص أبيض

2010-10-05T13:07:00.004-02:00

ما فيي هجّ يا إمي
مِنِ الجلد اللي خيِّطتو ع ضوّ سْراجْها ستّي
مِنِ عْضامي اللي حَطّبها مِنِ قْْلوع الصَّخِر جدّي
من اللحم اللي إسّاتو مَا خلّص ديّتو بيّي
ما فيي هجّ من حالي
من عيوني اللي ضوّاها قمر ع سْطوح حارتنا
من الضحكة اللي إسّا معلّقة حبالا بخشب زيتون ضيعتنا
من الدّمّ اللي بعروقي
لا أزرق لونو لا أحمر
أنا اللي في تحت جلدي
أغاني بريحة الزعتر
يا إمي في وشم بيّن ع زندي وما وشمتيني
جرح كفّي شفي وجوّاتو خبّالي بَحِص أبيض
بحص من درب عتراتو قدر مكتوب ع جبيني
لوين بهجّ يا إمي
لوين بهجّ واللذة، إذا ما بغمّسا بزيتك، طعمتا علقم بتمّي
لوين بهجّ بلساني، اللي مهما تغرّبوا حروفو، ع راس الضيعة لاطيلي
لوين بهجّ والكلمة، متل شرياني مَ تْغنّي، ع دقّة طبل وع الميلة
======
بحص: حصى
قلوع جمع قلع: مكان في التل، عادة يكون مليئاً بالصخر، وربما يسمى كذلك لأنهم يقتلعون منه أحجار البناء، أو خشب البناء، أو حطب الشتاء
راس الضيعة: بدايتها
لاطيلي: يترقب وصولي أو ينتظرني - مثل الثعلب الذي ينتظر الفريسة
الميلة: من إيقاعات رقص الدبكة وهي الشبّة والميلة وغيرها

رح تسلم الجرّة

2010-03-12T22:59:00.000-02:00

وكمان هالمرّة

رح تسلم الجرّة

لا تحضّروا سكاكينكون باقي أنا

متل الشجر باقي

بغصون مخضرّة

ما حلّكون يا هالليالي تسمعوا عني

عن الشمس اللي بضلوعي

عن الصخر اللي فتفتّو

بعرق صابيعي ودموعي

عن الفينيق وجناحو فضا روحي

عن اللون اللي كل ما مات

بيفجّر نبع ألوان بجروحي

أنا باقي

متل زيتونة ما بتفنى

ببلادنا السمرا

مرّة بعد مرّة

رح تسلم الجرّة

بكرا الزمن

2010-01-12T00:15:00.000-02:00


بكرا الزمن بيحلحل الأسرار
بكرا العروس
وبين خوفا والدلع
بتحلحل الزنار
بدو وقت
لا تعص ع جروحو
بدو وقت
تصفى سما روحو
بكرا الزمن
بيفكفك العقدة ورا العقدة
بيخبّر حكايات مكتوبة
بحروف تلج ونار
بكره الزمن بيخبّر الأسرار

قبل الطوفان

2009-09-21T10:01:00.007-02:00

معقولة تغرق جنّتي الموعودة بالطوفان
شو دخّلو حلمي الصبي
بركي ما لاقى نوح دعساتو
لمّا دَلَف متل النبع واتخبّى بالوديان
واستنظر رفيقو النبي
ت يعدّ للميّة
كان الحرش إلنا
نغرف عطر من خشخشات وراق أيلولو
وحْجار هاك البيت تعرفنا
حتى الشمع حابس ورق ودموع وحكايات
يضحك لشوفتنا
نستنظرو تمّوز يرسمنا
فوق العشب رشّة سحر
لما إجوا الغربان من أرض الفِتَن
عبّوا المسالك موت
سحبوا بساط العشب من تحت الحرش
فتّح ما لاقى اللون جوّاتو
وتسمّروا عيونو
لمّا قبر منحوت ع غفلة نبق
دعّس ع ورداتو

هالكون ما تغير

2009-07-09T13:51:00.005-02:00

عا قدَ ما تغير

هالكون ما تغير

إساتها جديدة القصص

وبنسمعا

بعيوننا الدهشة

بقلوبنا رعشة

بس الملك هوَي الملك

والعبد اساتو عبد

واللي بعت بالماضي خيَال الظلم

يسرق صبايا من الكرم

ألله بعتلو اليوم نافورة عتم

ت يشتري فيها بشر

بالنار والدينار

واللي انخلق

لما انخلق

ت يخدم الأحرار

مفطور قلبو ع الوفا

شقَ البحر

هدَ الصخر

ودَى الرسالة

وانطفى

تعي

2008-04-04T18:06:00.006-02:00

طول عليي الليل يا شمس ارجعي ....... مقلوع قلبي من الشرش ما نو معي
هالعايشو مو شوق مو حزن وأسى ........ ولا بينحكى بكلمات يحكمها وعي
واصل ع حفة موت باقيلي شبر........... بوقع إذا ما إيدك انمدت..........تعي

رسالة من باسل

2008-02-19T17:48:00.001-02:00

باسل، ابن عائلة لبنانية مغتربة، طفل عمره سبع سنوات، خرج من بارانا - البرازيل ليقضي الصيف في ضيعته الجنوبية التي طالما حدثه أهله عنها، في زيارة لأقرباء له، فكان أن حصدت جسده الطاهر آلة العدوان الآثمة


طِلِعْ مَظبوط يا بيّي

مِتِلْ ما كنْت تحكيلي عنِ بْلادي

"عنِ التلة وْعنِ الوادي"

عنِ الْجنة

عنِ عْصافير عَ الشبّاك بِتْغني

عنِ تْرابِ الْعِطِرْ والطيب

"عنِ الشَّمس اللي ما بتغيب"

طِلِعْ مَظبوط يا بيّي

متلْ ما حْكيت.. بسِّ نْسيت تحكيلي

عنِ المَرْجوحة ياللي مْعلّقة بالغيم

عنِ جْوانح رسمْها الضوّ عَ كتافي

عنِ جرار العَسل بتْشرّ ع شْفافي

عنِ الدّنْيي اللي ما فيها بشرْ تِكْره

يا بيّي بعْرفِ بْتزْعل

إذا بلاقي - من بلادي - بلد أحلى

ما فيّي اليوم ما قلك:

ع قدّ بْلادي مو حلوة

أنا لقيت السّما أحلى

ما في طريق

2008-02-15T02:43:00.016-02:00

ما في طريق
لمّا إنِتْ تمشي
خطواتك بتخلق طريق
من قبلا ما في شي
لا في نجوم ولا قمر
لا حتى في دروب وطريق

بتوقّف بتتطلّع بماضي وراك
بتشوف شو في دروب ما مشيتا
لا عاد تمشيّا
ولالك دخّل فيها
من غير خطواتك إنت
لا في طريق ولا نجوم ولا قمر
وغير الزبد هالموج مو تارك أتر

ما عد حمل قلبي

2008-02-02T12:54:00.000-02:00

ما عدْ حِمِلْ قلبي غربة ع هالغربة بدّو ت تهْدى جْوانْحو بسِّ الدَّرِبْ صعبة *** متعوّد -وكفّي النّدى- إسقي الزّرِع إتسابق جموح المدى بْجانح شَمِع خلِّي الشمس جنبي تسمعني وتلبّي تنزلْ برِدْ ع جْوانْحِي وتعطِّرا مْحبّة *** بكرا بسما غير السما رح برتمي والرحلة ترجع ترسما مواسم طمي غربة بعد غربة ما بتهدى يا دربي جايي ع بالي غطّ بسِّ مْزاري متخبّي *** ما عدْ حِمِلْ قلبي غربة ع هالغربة مشتاقة تهْدى جْوانحو بسِّ الدَّرِبْ صعبة ***

يا بلادي يا سمرة

2007-10-23T21:13:00.000-02:00

يا بْلادي بدّي غنيلك
باقة بنفسج نقيلك
إرجع طفل وبدحبيلك
ت فيكي إتمرّى
يا بْلادي يا سمرة

***

قارة النبك دير عطية
طلعوا عراضة شامية
حلواية كانت منسية
غنوا فرح عمرا
يا بْلادي يا سمرة

***

زيتونة الغوطة بتحكي
ت خيتا تسمع ببملكة
يلا سوا نخلي الدبكة
تطرح أرض خضرا
يا بْلادي يا سمرة

***

بحمص القلب تارك بسمة
ذكرى متل رقّ النسمة
بأحلى الصور عم ترتسمي
إم ونهر صدرا
يا بْلادي يا سمرة

***

سامع عنين الناعورة
عم تشكي بركي بنزورا
حزن اللي عربش ع زهورا
ما دبّل الزهرة
يا بْلادي يا سمرة

***

خدني معك على راس العين
حيي الميادين وعفرين
قلبي بحلب حبّ التنتين
شقرا بجنب سمرة
يا بْلادي يا سمرة

***

غنى الفرات بدير الزور
من شوقو ت يلاقي الخابور
بجسر الشغور الحب زهور
فتح ع المْعرة
يا بْلادي يا سمرة

***

تدمر عروس الصحرا تبوح
عن الغزال الأضنى الروح
والبوكمال بعطرا تفوح
قهوة عرب مرّة
يا بلادي يا سمرة

***

غنيلي درعا وسويدا
ودندن ع هالنغمة وعيدا
مهما وصفتا ما بزيدا
كلاّ سحر بصرى
يا بْلادي يا سمرة

***

ع اللاذقية وديني
جبلة ع غفلة تلاقيني
قضي مع صحاب سنيني
بشط البحر سهرة
يا بْلادي يا سمرة

***

غصّة ألم شو خبيتا
يوم الوداع بصافيتا
والدمعة بيي ما نسيتا
لو طالت السفرة
يا بْلادي يا سمرة

***

هيك الشآم بلاد النور
مهما الرياح عليها تجور
ما بينكسر عرق المنتور
ولا بتنطفي الجمرة
يا بْلادي يا سمرة

***

أمسية شعرية

2007-10-16T21:13:00.001-02:00

شاركت في أمسية شعرية يوم الأربعاء في العاشر من تشرين الأول، في المركز الثقافي العربي في ساو باولو، حيث ألقيت بعض قصائدي بالعامية.

ورجعت

2007-09-11T23:05:00.000-02:00

كمّلت يا بيّي الدّني ورجعت

وشربت من دمع اللقا ت شبعت

متل الحلم لحظة مرق هالليل

والضوّ رجّعني متل ما طلعت

طحل قهوة

2007-03-08T11:58:00.000-02:00

خِلْصِتْ قَهوتي وْبَعِدْني سهران

دوِّر ع شي طير بْطِحِل فنجان قصقص حروفي وطرِّزا مشهد عشق

أو جلغم الفنجان بالصورة

أو انزمق بين الشتي والليل

ع اللسّ افتح باب ما بيعرف قفل

سرسب متل نسمة على تختي

شيلون سوا من تحت المخدّة

بيجامتي ودفتر شعر

إلْبَت إذا حرطق حدا بنمليّة المطبخ

استنظرو ت يسخِّن الأبريق

عبِّي الروايا عْطور من زوفا وحبق

...

وِبْآخر الفنجان

مِتْل اللي صرلو دهر مااتديّر

إفتح ع أهلي الباب

بوِّس سبع دهشات من شكل الشَّمِسْ

قلّون: صباح الخير

========

طحل القهوة: هو ما يتبقى منها، لتقرأه البصارة

يجلغم: يعني يوسخ أو يرسم بشكل فوضوي

انزمق: أتسرب

ع اللس: بشكل خفي

إلبت: أصمت أو أهدأ مخافة أن يدرك أحد وجودي

حرطق: أصدر ضوضاء

نملية: صندوق لوضع الطعام

استنظرو: أي أنتظره

الروايا: الرئات

الزوفا: عشب بري يطبخ كالشاي

ما اتديّر: كلمة شديدة المحلية تعني لم يترك مكانه

الحبق: نوع من الورد

جيتي الشعر

2007-02-18T19:18:00.000-02:00

لما ما ضل بهالدني شي صدّقو

أو إعشقو، حتى كذب

جيتي

نبض شريان ناسيه القلب

جيتي عشب

نبّت ع صخر الموت

ع الأحزان

جيتي عقد رمّان

وتفرفط.. قمر

ع دفتري المحروق حرفو بْلا وتر

جيتي العمر

جيتي الشعر

جيتي الإله الناطرو صرلي دهر

حاشى المهد

2007-02-05T09:06:00.000-02:00

لإن سَعَتْ في دروب القلبِ أوطانُ .... كلُّ الأماكنِ حاشى المهدَ سيّانُ قد طُفْتُ نصفَ الدّنى لمّا أجدْ وطناً ........ فيه ينامُ قريرَ العينِ إنسانُ

الحداثة في معلقة طرفة

2007-02-01T11:34:00.000-02:00

ما يذهل حقاً في شعر طرفة بن العبد هو أن الصور لديه، تلك التي يغلفها قالب رفيع الصنعة

من الجزالة والبلاغة لا يضاهى، هذه الصور لا تقف عند معناها المباشر، ولا تقف حتى عند

التشبيه الشكلي اللاحق الذي تقدمه، ولا التشبيه التالي، بل أنها تتجاوز ذلك لتفتح آفاقاً من

الصور والمقاربات المذهلة، ولتحمل أبعاداً أخرى تتجاوز بكثيرأبعاد الفراغ المنظور.
أول الأمثلة على هذا يأتينا مباشرة مع مطلع معلقته الشهيرة: لخولة أطلالٌ ببرقة ثهمد ....... تلوح كباقي الوشم في ظاهر اليد ألا نستطيع الإدعاء أن هذا التشبيه يتجاوز المقاربة الشكلية بين شكل الأطلال، وشكل بقايا

الوشم إلى الوصولإلى مقاربة علاقة الأطلال بنفس تاركها مع علاقة الوشم باليد ودلالاته؟ وسريعاً سريعاً، يأتينا المثال الثاني في البيت الخامس من المعلقة: يشق حباب الماء حيزومها بها .... كما قسّم التربَ المفايلُ باليد بداية، هو تجاوز هنا مسبقاً التشبيه الأول الذي كان قد اعتمده في البيت الذي سبق هذا

البيت، ففي الحقيقة لا ثمة ماء ولا سفن، هو يتحدث عن مواكب الإبل التي حملت حبيبته

يوم الفراق، ومع ذلك فإنه لا يقف عند هذا الحد، بل يعمد إلى تشبيه عظيم الدلالة، فيشبه

شق السفن/الإبل لعباب الماء/الصحراء، يشبه هذا بحركة لاعب الفيال، وهي لعبة يقوم

خلالها اللاعب بجمع التراب فيدفن فيه شيء، ثم يقسم التراب نصفين ، ويسأل عن الدفين

في أيهما هو.. أليس هذا إدلالاً منه على حيرة نفسه حول غموض مصير هذا الموكب الراحل؟؟ ونلهث في دهشاتنا المتلاحقة لنقف في ذهول أمام البيت الثاني عشر، والذي - مبدئياً -

يصف فيه ناقته:

أمونٍ كألواح الإرانِ نصأتُها .... على لاحبٍ كأنه ظهر برجد يا ويح قلبي، ما هذا؟ أمونٍ كألواح الإران!!!!!!!!! أمينة كالتابوت!!!! وهل ثمة أمان أعظم من هذا؟؟؟ نصأتها على لاحب كأنه ظهر برجد!!!! أستعجلها بالضرب والتقريع، في طريق جميل واضح كأنه كساء مخطط في عرضه أهو يتحدث عن الناقة حقاً؟ أم عن حياة نلهث بها ونعلم أن لا ثمة ما يجلب أمانها

وراحتها سوى الموت!!!

الآن أريد أن أضع ادعاءً يقول أن المبدع في تعامله مع الأشياء التي تحيط به هو

أميل الناس إلى الوعيالطفولي المبكّر، ذلك الذي لا يفصل بين الأنا والآخر، فرسم

الجوكندا الذي يختزن ملامح وروح ليوناردو دافنشي نفسه مثال صارخ عن هذا

الاختلاط الإبداعي الفطريّ. أدّعي هنا أن المبدع لا يتقصد هذا النوع من الإسقاط،

بل أن هذا الإسقاط يتسلل بشكل تلقائي ليظهر في رسومه وكتاباته. أحسست بهذا الشعور، وأنا أتابع وصف طرفة للناقة، فعندما يمتدحها إنما يمتدح

من خلالها خصالاً في نفسه، وعندما يختار تشابيهه فإنها تأتي لتعكس ما في داخله

من مخاوف وصفات وقناعات!! أفلن يؤدي ذلك بشكل تلقائي إلى حضور الرمز؟؟ يقول: تَرِيْعُ إِلَى صَوْتِ المُهِيْبِ وتَتَّقِـي بِذِي خُصَلٍ رَوْعَاتِ أَكْلَف مُلْبِدِ فهي تستجيب لصوتِ من يرعاها، وتتغاضى بازدراء عن أصوات الحثالة القذرين..

أفهل تمتلك الناقة حقاً هذه النفس الكبيرة؟ أم أن من جعلها تتحلّى بها هو الشاعر

الذي وضع ذاته النبيلة في كل دقيقة من دقائق وصفها، حتى بات هذا الوصف وصفاً

داخلياً تجريدياً منسلخاً عن موضوعه الأساسي. يقول طرفة: كَأَنَّ كِنَـاسَيْ ضَالَةٍ يَكْنِفَانِهَـا وأَطْرَ قِسِيٍّ تَحْتَ صَلْبٍ مُؤَيَّـدِ لَهَـا مِرْفَقَـانِ أَفْتَلانِ كَأَنَّمَـا تَمُـرُّ بِسَلْمَـي دَالِجٍ مُتَشَـدِّدِ كَقَنْطَـرةِ الرُّوْمِـيِّ أَقْسَمَ رَبُّهَـا لَتُكْتَنِفَـنْ حَتَى تُشَـادَ بِقَرْمَـدِ شرح هذه الأبيات الصعبة المفردات تجدونه هنا، ولكنه باختصار هنا يلجأ إلى

تشبيهات الوحشية والقسوة لحماية هذه الناقة/الحياة/الشاعر، وإلى التصميم على

البناء المحكم، هذا البناء الذي يأخذه من ذاته العنيدة والصلبة.

قل لي كيف ترى الدنيا

2007-01-22T21:31:00.000-02:00

لا أزعم أني أملك أدوات النقد الفني التي تمكنني من أن أحكم على المستوى الحرفي للفيلم،

بدءاً بالسيناريو وتقطيعات المشاهد، مروراً بأداء الممثلين وصولاً للإخراج ، إلا أني وجدت

أن هذا الفيلم زاخر بما هو أبعد من مجرد جرأة مشاهد أو سبر وثائقي لمجتمع مكبوت أو

طرح لقضية صادمة كمسألة الختان، فقد رأيت فيه فيلماً رمزياً إلى أبعد الحدود. تسمية بطلة الفيلم بدنيا لم يرد عبثاً، بل هي دنيا بحق، وهؤلاء روادها: الفيلسوف الذي يريد الحصول على لذاتها من خلال العقل والقلب وهاهي في النهاية تستجيب

له بالعقل والقلب وتهبه متعتها، هذا العاشق الصوفي الذي ينهل من ينابيع ابن عربي والحلاج،

ويعيد خلق الضوء لأجمل ما يخلق الضوء لأجله.، يعلّم الدنيا ويتعلم منها في المقابل، هناك الشخص العادي، العملي، الذي يريد الدنيا مطفأة لحرائق رغباته وها هي تطفئ

رغباته جسداً بلا روح، فتصل معه في النتيجة إلى أسوأ ما يكون إطفاء الرغبات، ولو تم ذلك عبر

الزواج، الصيغة الأكثر قبولا، لا بل ربما الصيغة الوحيدة المقبولة في مجتمع عربي، للقاء جنسي: بين الاثنين، وعلى بعد من هذه الدنيا، بلا تعريف ولا هوية - ولا جنس ربما - ترى ذلك الراقص

مع دوران الأفلاك، ثورته هي صدى قلقه الذي يمنعه عن التوقف، يريد أن يعلّم الدنيا وأن يسيّرها

فتفلت منه، تتعلم منه ولا تعلمه من المفاجآت الجميلة التي حملها الفيلم مشاهده الجنسية، البعيدة كل البعد عن الإباحية المجانية،

والبعيدة أيضاً كل البعد عن البراءة والسذاجة والتقية الكاذبة.. هي تركيبة نادرة الحدوث، ومعقدة

إلى أبعد الحدود. فيلم دنيا، مشروع كبير ربما أثقلته طموحات العاملين عليه، ولكن المؤلم الذي رأيناه ونراه هو أن

تعمل سطحية التلقي على الإجهاز عليه في مهده ، أمر بات شبه مؤكد في مجتمع عربي يدوس

أشياءه الجميلة، بما فيها تراثه الرائع.

المرعب هو أن هذا الدوس المنظم يتسلح بالسلفية، فيما حقيقة الأمر أن السلف إذا حدث ونظر من

عليائه إلى هذا الكائن المتهالك فإنما بعين الشفقة لا أكثر

كلامك، لو ترجّي، أمر

2007-01-12T15:12:00.000-02:00

استمع هنا إلى الأغنية بصوت زاد الخير

يا بيي، لو ركض هالعمر خيالك بالجوانح عطر لصوتك مهجتي بتحن كلامك، لو ترجّي، أمر حنيني مو دمع ع الخد حنيني للسنابل وعد حديثك مركبي وشراع وشدة ذاكرة ع الزند يا بيي ما أخدني النو ولا قرّب ع دربي السو على جبين العمر مكتوب إلك راجع ع خيط الضو

2005

حنين.. الأسطورة

2007-01-03T23:09:00.000-02:00

شو مصاحْبة بِزْمانها عشاق شي مشوّهين وشي ما في عقل بيتصوّر وبيحوش مو همّ كانوا وحوش عميان، طفرانين داقوا العسل طافح من خدودا شي فتّحوا الوردات ع نهودا مَنزولها تحت الدرج، بالحرش، أو حتى بنصّ المدافع والأنين كانت "حنين" ملْكة ع عرش مهمّشين ما بيعرفوا وردا إلا اللي مرّوا بليل ع خدّا وحفنة بشر منِ مْنزلون هجّ القمر شي أرملة أو شي عجوز العمر عتّرها كانت "حنين" الساقية اللي الجود عطّرها أما البشر كل البشر فتسابقوا لو يرشقوا خدّا بحجر قالوا خلقها الرب ت يدوسا البشر *** وبليلة ما غاب القمر فتّح طريقو بين غيمات الخَدَر فات الوحش (صمصوم).. شو قتّل بشر دمّر منازل وانتصر قال المدينة اليوم ح تصفّي خبر يمّا اسمعوا عندي لإلكون حل يا عالم.. تعوا خلوا "حنين" تنام عندي بمخدعي وفردي ع خصري وعد إلكون رجّعوا معقول؟؟ رقباتنا تصبح رهينة للعهر رهن الْ خلقها الرب ت يدوسا البشر بس الحقيقة هيك هالعاهرة اللي صار متل الأرض خدّا فتنت جموح الوحش صفّى الوحش عبدا راحوا البشر عندا يتسابقوا ع بوس ديّاتا وهيي مع الجربان رح بتنام أما الوحش لو شو.. ما بدّا جاها المشايخ والولاة ركعوا وذرفوا دموع قالوا "حنين" حتماً خلقها الرب قديسة وبتجوز ع اسما الصلاة شافت "حنين" الدمع نسّاها ظلم البشر حملت على قصر الوحش شو ضلّ من وردا وعض الوحش خدّا وتاني صبح هجّ الوحش وأهل المدينة عاد صوتون هالعتيق يتسابقوا من جديد يرموا حجر عاللي خلقها الرب ت يدوسا البشر!!

آب 2005

صار الوقت نشفى

2006-12-20T23:33:00.000-02:00

يِمْكِنْ مو هالقدّي بَرِدْ، لكن أنا بردان يِمْكِنْ مو هالقدّي عَتِم، بسِّ انْغَشوا عيوني يِمْكِنْ بَعِدْ خطوة، بَعِدْ مفرق، بَعِدْ شي درْبْ، لاقي قلْبْ ناطر تَ يحكيلي، تَ إحكيلو، تَ يمشيلي، تَ إمشيلو بسِّ البَرِد والليل شلّوني مين اللي فوّتنا سوا بْدوَّيْخِةِ الآلام خلّى الكِرِهْ عَرْبَشْ عَ سَجْرِتْنا لَشْ ت السُّؤال انْقَتَل وانْدَبْحِتِ الأَحْلام والصُّوت ما عَد لو صَدى تاه المَدى وتِهْنا يِمْكِنْ مو هالقدّي برد يِمْكِنْ مو هالقدّي عتم يِمْكِنْ إذا بنِحْكي سوا ِبْنِدفى ريح الْ مَ تِتْلوَّى عَ هالشِّبَّاكْ بتْخوِّف صارِ الوَقِتْ نَعْرِفْ صار الوقت نِشْفى

ضيعان الكلمة إذا ما رح توصل

2006-12-16T11:48:00.000-02:00

ضيعانو صوتي إذا ما بغنّيلك

ضيعان شموعي لو ما تضوّيلك

ضيعان البسمة

ضيعان الرسمة

ضيعانو اسمي

غابوا قناديلك

ضيعان الكلمة إذا ما رح توصل

ضيعان الوردة على غصنا تدبل

ضيعان كتابي

عمري وشبابي

عشقي وصحابي

والحب الأول

لا بدّي كنوزك ولا بدي عروشك

ولا إنّي صفّي حارس ع رموشك

كلّ اللي بدي

قدّملك وردة

وبليل الشدّة مدي لي شروشك

خلّيك عم تمشي

2006-12-13T13:04:00.000-02:00

لا تعيش بالماضي

لا تسلّم ظنونك لمستقبل

م بعرف أيمت بيوصل

ع بكرا أيّا شي ممكن يجي

ويمكن ما ييجي شي

لاتوقّف بمطرح

كل المطارح موت

خلّيك عم تمشي

غابت صورتك

2006-12-10T21:04:00.000-02:00

لا توقعوا متل الورق

من مشهد رجوعي

ناديت ت صوتي اختنق

واتجرّحوا ضلوعي

لو فيي رجّع هالعمر خطوة

إيامنا الحلوة

لو فيي وقّف هالزمن

ع المشهد الباقي

من ليلة فراقي

كل العيون ال دمّعت

كل القلوب اللي دعت

لو فيي سابق هالقدر

ما إتركوا يمسّ الصور

بس الحقيقة

فصول بعد فصول رح تمرق

ووجوه من ماضي الحلو

هالليل رح يسرق

هيك القدر جبار ما بيرحم

يا ستي مالي بهالمسا حيلة

إلا ع غيبة صورتك

إبكي وإترحّم

أكيــــد

2006-12-06T22:28:00.000-02:00

أكيد الشمس رح تطلع
متل كل يوم
صدقني
متل هالليل صار مارق عليي كتير
عتم فلتان مالو كبير إلا الضو
وأكيد الضو رح يرجع
أكيد الشمس رح تطلع
***
أكيد كتير في عالم
معك بالقلب
بس الدرب
ودّاها ع تاني ميل
وأكيد كتير في عالم
نسيها الحب
واتخبّى بضميرا الليل
متل هالليل صار مارق عليي كتير
عتم فلتان مالو كبير إلا الضو
وأكيد الضو رح يرجع
أكيد الشمس رح تطلع
***

صباح الخير ساو باولو

2006-11-14T10:04:00.000-02:00

صباح الخير ساو باولو صباح الخير يا مْدينة نسيها الرب أو يمكن ع كبرا طافت وما ساعتا عيون السما ولا رحمة الإنسان شرشر ع طرقاتا بشر صرلون دهر ما عرفوا شكل السقف ما ضمّتون حيطان *** صباح الخير ساو باولو صباح الخير يا مْدينة أنا بحضنك صبي مدلل ع كتر غيابي ما طوّل ع كتر الشوق والغربة صرت متلك يا ساو باولو غنى هالعالم بقلبي فقر هالعالم بقلبي فرح هالعالم بقلبي وحزن هالعالم بقلبي

شادي يا عصفور التلج

2006-09-15T17:35:00.000-02:00

إلى أخي شادي، وإلى كل شاب ما زال - رغم الضوء الباهت في آخر النفق - مصراً على أن يبني مستقبله وبيته داخل سوريا: ما أطولو بالك.. عصفور يا شادي.. طاروا ع أرض الشمس رفقاتك وإنت اللي عبّوا تلج ريشاتك ضليت مع هالصَّخر ما ملّيت مدبّق - قلب وجناح - بالوادي شادي يا عصفور التلج

محلاك يا شادي ... شو تعذّبت شو استنظرت شو شْقيت حتى تجيب زوّادة لوما القلب عمران.. ما استنّيت لوما الوطن إيمان.. لا ما بقيت هلّق يا عصفور التلج غني عشك يا طير البرد رح يكْمل سقفك رحِ بْيعلا ولو طوّل إنت اللي عندك صبِر بزياده شادي يا عصفور التلج

محلاك يا شادي ... بكرا الشمس جايي تضحك لعرزالك وغصون هالدّابت عِشِق بيزورها خيالك هاللي استعِجْلوا الشمس م يزيحوا التلج ما بيعرفوا بعد التلج جايي المرج؟ إنت المرج عندك هالأرض ياللي حقولها آيات وترابها عبادة شادي يا عصفور التلج مبروك يا شادي

مرقوا الفصول الأربعة

2006-09-01T23:14:00.000-02:00

قاعد ع شبّاك الوقت، مرقوا الفصول الأربعة، وما بعرف بأيَّ فصل صرنا

فصل الربيع؟؟ وليش عريانة الدني؟؟
بالصيف؟ شو اللي جاب هالتلجات ع بوابي؟؟
لأ مو خريف!! زهور قدّامي
أيّا شتي وفاتح قميصي للهوا، للشمس، للكلمات
قاعد ع شبّاك الوقت، عم مرجح الإيام والأحلام والكرسي
هجّ القلب ت يكسدر بدرب المسا، يتمعشق بنيّات وشبابيك ونسايم صبا
مرِّ الوقت، مرقوا الفصول الأربعة، فاق الصبح، والنوم غازلني

بيّك يا إبني فرّم سنينو

2006-08-24T13:06:00.000-02:00

إبني زعل م يفرّم سنانو... بيّك يا إبني فرّم سنينو فرّم عمر فرّم حلم وردي... فرّم وعد مكتوب ع جبينو فرّم شجر مزروع بشروشو... فرّم وطن مجبول من طينو بكره بدال السنّ راجع سن.. وبيّك بأهلو تلتقي عينو يضحك لملقاه الوطن شي نهار.. وتضحك معو يا زغير وتزينو

إلى صافيتا

2006-08-24T13:02:00.000-02:00

يا بلدْ عطاها الضوّ.. من صفا السما اسما يا ترى حلالي لو... إحلمِ بْمسا ضمّا إحلمِ بْمسا العشاق... بالدّرِبْ ع كتف التل بالوردْ ع مهلو فاق... والفجرْ ع أهلو طل بالبرجْ بِمار الياس.. بالدربْ جنب بيتا بالوردْ ع خدّ الناس .. بالأهلْ بصافيتا راجعِ بْعشق شلال... إلتقي بْأرضْ جنة يا سما وشجر وتلال.. يا مدى انْسرق منّي يا بلد عطاها الضوّ.. من صفا السما اسما يا ترى حلالي لو... إحلمِ بْمسا ضمّا

شوية رسوم قديمة

2006-08-15T23:14:00.000-02:00

....اضغط علىالصورة لتشاهدها بالحجم الاصلي....

----------------------------------------------------------

واقف ع حرف المشرحة

2006-07-31T15:17:00.000-02:00

هربان من جلدي

من زحمة الأنّات ع بوابي
من مدبحة بعيوني ما بتنام
غسِّل أتر من دمّ ع تيابي
مجبور ضلّ بمطرحي
واقف ع حرف المشرحة إبكي
يا ويل لو إسكت

ياويل لو إحكي

مهداة -سلفاً- إلى زعيم شرق أوسطي جديد

2006-07-26T18:22:00.000-02:00

هذه هي خريطة الدويلات القادمة التي تخطط لها أمريكا، وهذه سلفاً هديتي لكل من سيقبل أن يكون زعيماً تنصبه أمريكا على إحدى هذه الدويلات.. إن حصل هذا، وما أبعده

قديش رح تبقى؟ قبل ما تزلغط وتدبك فرح ستّي، وأنا عم خبّرا

بصوتي الولد إنّو النّدل

ياللي رضي بكرسي العهر مبلولة ببزاقة عدوّ الشمس صفّى متل أصلو

رجع جيفة *** قديش رح بيمر

ت كفوف البطل تمسح عن البارودة غبرات الزمن وتصوّب رصاصة كرامة تزلزل الليل البهيم وتفتح الشبّاك لشموس الأمل *** قديش رح يمضى يمكن شهر، يمكن عمر،

يمكن شي ميّة جيل إلا وما تعرف هالدني إنك بنفودك وبنقودك وتوب الدهب شقفة ندل ما بتسوى أكتر من تمن طلقة إذا بتسوى ***

لأن الصمت عار

2006-07-24T22:56:00.000-02:00

يظل مقامهم أعلى من أية كلمات، ولكن الصمت عار

قلتلا يا إمي قومي ت نتفرج ع هالغارات شوفي السما مليانة طيّارات إمي ما حاكتني ولا بحضنا ضمتني ع خدودا ما مات الورد ورد ال ع خدّي مات

شو كبير يا دمّو طفل اللي وسْع جْوانحو هالكون عربش ع كتف الشمس لبّسها تاج العرس وبولدنة شخبط ع حيطان السما ودلدق خوابي اللون

ما بيعبروا أيّا نهر إلا نهر دمّي بستشهد بوفّي النّدِرْ بترابا يا محلى القبر قبري حضن إمّي

أربعة يّام

2006-07-18T03:59:00.000-02:00

أربعة ايّام بيمرّوا ماأَمَرّ غْيابون ماأمرّو ناجي أيوب ببعدون بركي بيهديني سرّو *** بْحاكي الحيطان وحالي صوتون م يرنّ ببالي وِبْدوّر ع خيالاتون مابلاقي إلاّ خيالي *** وينا ضحكاتون لمّا تنسّيني الدنيي وهمّا من ركض نهاري هدّي إركض ع ورودي ضمّا *** عتّم هالبيت الفاضي متل زواريب الماضي عجِّل يا نهار الجمعة رجّعلي العيش الراضي *** أربعة ايّام بيعودوا ت الورد تردّ خدودو لكن في بيّ مستني من سنين يلمّ ورودو ***

طيارة ورق

2006-07-09T22:44:00.000-02:00

كبكوبة خيطان بإيدي وفوق الغيمات الطيارة حمّلتا شوقي وتنهيدي وهموم الروح وأسرارا

* * *
عليت فوق حدود الغربة وغطّت ع سطيحات الحارة شافا الطفل وزتّ اللعبة وبلهفة لحق الطيارة * * * ركضوا دراج البيت قبالو والدقات بقلبوا جنوا والحلم ال ما فارق بالو قرب متل الكذبة منو * * * حمل الطيارة وحمليتو وصاروا غنية مكتوبة وكيف بدّي ردّو ع بيتو فلتت من إيدي الكبكوبة

وبتحلى الأشعار

2006-07-07T11:13:00.000-02:00

يا محلا نوّار بعيونو بشوف رفاقي وأهلي والدّار كلّ اللي ضاعوا مني وصاروا تذكار بيهلّوا نسمة صيف وموسم أزهار شي يضحك نوّار ***

يا محلا حيّان كلماتو بلسم شافي وقلبي تعبان بيخلّوا الليل الساكن يسكب ألوان محلا نظرات عيونو تروي العطشان وترجّع نيسان ***

يا محلا ميّار يناغي عصفور الجنة ووردات الدار بيشيل همومي عنّي لو مهما صار بيكفّي يطلّ بيضوي هالليل قمار وبتحلى الأشعار

***

الأخطاء السبعة التي أسقطت البرازيل

2006-07-02T22:07:00.000-02:00

عطالة المجموعة

تماماً كما قانون نيوتن الأول بخصوص
العطالة، كان لدى باريرا عدد من النجوم تتضارب مواقعها في المنتخب، ولأنه أصر على تواجدها
جميعاً ما كان منه إلا أن وضع بعضها في غير موقعها الصحيح، مما أوصل إلى أن يلغي كل منهم
الآخر ونحصل في النهاية على فريق ساكن لا يتحرك.
غرور المخضرمين أو "المقدسين" ذوي المكان المضمون في المنتخب بغض النظر عن مستوياتهم. روبرتو كارلوس صرّح أن
فرصة البرازيل للفوز بالكأس هي 80% (وانتهى هارباً خلسة من باب خلفي في فندق المنتخب).
رونالدو لم يتقبل أي نقد، وكافو وصل به الأمر أن ينتقد منتخب البرازيل 1982 الذي سحر
العالم في وقتها، وحتى يومنا هذا.
تردي أداء رونالدو وأدريانو يتحمل ثنائي الهجوم الكثير من المسؤولية في خسارة المنتخب، رونالدو وصل إلى معسكر المنتخب
التدريبي بوزن 95 كغ، وأدريانو - وبدلاً من أن يلعب كرة قدم - كان مهزوزاً عاطفياً، واعتبر
نفسه مضطهداً أو مهدداً لمجرد استبدال روبينيو به في مباراة اليابان.
الاستعداد السيء المعسكر التدريبي في سويسرة كان كرنفالاً وإمضاءات و"عناقات" مع المعجبين والمعجبات. المباريات
التدريبية كانت مجرد نزهات مع فرق ضعيفة جداً، ولم يكن هناك تحضير بدني حقيقي. المدربون
يتحملون المسؤولية كاملة.
تراجع مستوى كافو وروبرتو كارلوس على العكس من زيدان الذي يقدم أفضل مستوياته في عمر الرابعة والثلاثين، فإن لياقة كافو
خانته في لحظات كثيرة، ولكنه - بأسلوبه القيادي وتفانيه - يبقى على الأقل أفضل من روبرتو
كارلوس بكثير، فهذا الأخير لم يجلب معه إلى البطولة سوى الغرور والتكبّر. في لحظة تسجيل الهدف
الفرنسي، ترك هنري ينطلق وحيداً، وأخذ يهندس جواربه!!!!
زين الدين زيدان هذا هو بحق غول البرازيل، تملك وسط الملعب وفعل كل ما طاب له: ترقيصة لرونالدينيو، قبوعة
لرونالدو، وتمريرات قاتلة جاء من أحدها الهدف الفرنسي.
لاعب مثل هذا لا يمكن أن يترك حراً دون رقابة مباشرة، كما حدث في مباراة البرازيل.

خيبة الأمل الكبرى: رونالدينيو أقول لكم، هذا اللاعب سيصبح في عرف العالم والتاريخ مجرد لاعب أندية إن لم يجد خلال السنوات
الأربعة القادمة مكانه الصحيح في المنتخب البرازيلي. لا زلت أؤمن أن هناك مدرب ما سيحسن
الاستفادة الحقيقية من هذا اللاعب في منتخب البرازيل، لأن الموهبة - بالتأكيد - لا تنقصه.

هيي الطابة

2006-06-23T23:23:00.000-02:00

لما تْهدّي بتملّي السّاحات مْودّة بتنسّي المقهور هْمومو وصوتو للغيمة بِتْودّي ... لما بْتمشي بتمرق فوق الدنيي رعشة وهالبنت ال ما إلها كلمة بيصفّي بإيديّا كلشي ... هيي الحلوة مخلوقة ت تحبّ وتغوي ع محبتها الكل بينووا وبالآخر هيي اللي بتنوي ... هيي الطابة مع إنّا حلوة وحبّابة لكن لو يهملها العاشق بتبكّي عيونو الكذابة ...

جني يا خيولي البرية

2006-06-12T16:37:00.000-02:00

جني يا خيولي البرية ملّي نهداتي حريّة

لو سكت هالصوت بتمّي كوني صوتي والغنية

* * *

لو زماني ما هدّاني بالعتم وحدي مشّاني خيلي ياللي أرضك دمّي كوني بالعتمة عنواني * * *
ضلّي بالعالي مفلوتة صرخة ما بعمرا مكبوتة لو هدي المدّ البعروقي هالدّني رح تعلن موتي * * *
بدّي غني وغني وغني أحلى عمر وأصدق جنة دقّة دقّة ضلّي بعمري وبالمدى يا خيولي جنّي

* * *

الدودة وعصفور الدوري - أغنيات للأطفال

2006-06-05T10:48:00.000-02:00

الدودة وعصفور الدوري ----------------- - يا دودة يا دودة اعطيني بوسة يا دودة - أبداً ما بتاخدها - رح إهجم اسرقها - يا دوري يا دوري شو هالمخّ العصفوري ضحّكت عليك الكل خدّي من تاني حلّ الصرصور الكذوب -------------------- هالصرصور النازل خرط.. خرط.. خرط قال في عندو سبع قصور شوفوا بالله ع هالخرطة ليش ت ساكن بالمجرور ها ها ها... هو هو هو.. ليش ت ساكن بالمجرور هالصرصور النازل خرط.. خرط.. خرط قال في عندو سيّارة شوفوا بالله ع هالخرطة ما عندو إلا حمارة ها ها ها.. هو هو هو.. ما عندو إلا حمارة هالصرصور النازل خرط.. خرط.. خرط قال اتغدّى كافيار شوفوا بالله ع هالخرطة متغدّى لبن وخيار ها ها ها... هو هو هو.. متغدّى لبن وخيار هالصرصور النازل خرط.. خرط.. خرط قال نايم ع ريش نعام شوفوا بالله ع هالخرطة ع مخدّة جدّو بينام ها ها ها... هو هو هو.. ع مخدّة جدّو بينام --- * اقتباسات من أغنيات برازيلية

جكر بالطهارة

2006-06-04T13:34:00.001-02:00

يابيرم أخدني لعندك نغم سحر من كلامك سقاني وحِكَم عزمتك ع سهرة تتعرف شو بعدك بلانا الزمان بحمير وبجم *** ت نِقلي ع نار المساخر مساطر لا ماضي شرفها ولا بكرا ولا حاضر م يحكوا بفضيلة وحقيقة وضماير جكر بالطهارة خروا ع العلم *** إذا الكفّو جلغم بدمّ الأهالي م يعطي مواعظ لبو جبين وعالي شهيد اللي بدّد ظلام الليالي بعُرف الخيانة بهيم وغنم *** عراق ال مالحّق وعي من سباتو وعهود الظلام وضحايا اللي ماتوا نزل ع الجحيم بعقايد فئاتو وجهاد الثوابو ضرب بالصرم *** ع سوريّا برجع ت شوف العجب حرامي م يحكي بلسان الأدب قلم للي يدفع وتحت الطلب يا ريتو خري وما حكي هالقلم *** سمعني وصفن بيرم بهالجمل وقاللي يا إبني نصيحة بجمل لا ترمي اللآلئ لأهل الدجل لا فهموا كلامي ولا رح تنفهم ***

الشهداء

2006-05-06T02:10:00.000-02:00

لوما النّدى ع الورد شو فيّق البسمة لولا ما يدمى الصبح شو هجّج العتمة لوما ع باب القدر دقّوا شو جاب الضوّ لولا ما دمّون حكي شو نفعت الكلمة *** مرقوا ع بابي الصّبح بتياب ورديّة ما وقّفوا يقطفوا ياسمين إيديّي ما لْحقت أعرف حدا هبّ النسيم وعيت وعروق دمّي انتلوا نهدات حريّة *** تاري النسيم المرق عطر الحبق دمّون مدّوا ليومي جسر من ليلون وهمّون صفّوا عرايش ورد تعلا لفوق الغيم ت يبوسوا خدّ السّنا ال بجوانحو ضمّون ***

صديق الانترنت

2006-05-04T10:16:00.000-02:00

برّه عالمنا الحقيقي... جا طريقك ع طريقي

إنت ياللي فيي قلّك... من قلب صادق صديقي * * *

يا ما كلماتك هدوني... ضوّوا دربي ونوّروني

رجّعوا البسمة للوني... ردّوا بعيوني البريق

إنت ياللي فيي قلّك... من قلب صادق صديق * * *

حتى لو طوّل غيابك... بشعر ببابي ع بابك

بسأل بلاقي جوابك... مركب لهمّي الغريق إنت ياللي فيي قلّك... من قلب صادق صديق * * *

لمّا ع الليمونة تحكي... هالشجر ورقاتو تبكي

طفلة للزيتونة تشكي... ضيّعوا حلما البريء

إنت ياللي فيي قلّك... من قلب صادق صديق * * *

حتى لو مرة افترقنا... باقي هالحلم ال جمعنا

نرجع نكفّي وأملنا... نلتقي حق وحقيق إنت ياللي فيي قلّك... من قلب صادق صديق

بتتذكّري يا شام

2006-04-20T19:37:00.002-02:00

بتتذكّري يا شام في مرّة صبي قلبو طِهِرْ أبيض مِتِلْ توب النبي نايم ع جرحو مفكَّرِا عتْمِ الدّني ما شافِكِ وْعطْر الحلا عمْ تسكِبِي

***

ما ضل يسمع كلّ الحكاية بْقلبك سكن دمعة مخبّاية واسودّ قلبو وصار عينو تشوف كلشي لحزنو ودمعتو مْراية *** قولك يا شام اليوم رح يسمع صوت الفَجِرْ وعْيونو رح تدمع يعشقْ مِتِلْ ما كْتير عِشقوكي يعلقْ بِحِضنك ما بقى يرجع ***

حب من طرف واحد

2006-04-16T01:53:00.000-02:00

ما همَّ لو أحببتني أو لم تشأ ليلي، بلا وردٍ، تخضّب بالعبير وأضلعي مشدودةٌ أوتارُها إن تلمسِ الهواءَ قربَها ترتّلِ الشذى في راحتيْ نايٌ شجيّ إن شدا لم تدرِكِ الأرواحُ غايتَه أتراهُ يشكو من نوى أم يحتفي مطرَ الهوى إن كنتُ أحزنُ من جفاكَ فإنَما أسفاً على فردوسِ عشقٍ لم تلِجْه ومرتعٍ للحسِّ لم تظفرْ به ودقائقٍ من سكّرِ رُشّت على قسماتِ أيّامي ومحافلِ الأسرارِ: أحلامي إن كنتَ لم تذُقِ الهوى أدعو لربِّ العشقِ يمنحْك اللظى عارٌ عليهِ صقيعُ روحِكَ يومَها، لا فرقَ إن بودلْت حبّاً أو حظيْت بكل هذا العشق صبّاً

حبي لكِ

2006-04-14T17:24:00.000-02:00

حبي لكِ لم يُسْبِلِ الجناحَ بغتةَ ألقى على شبّاككِ حُنّاءَه وتذوّق العسل السخيّ كأنما، خلْف الإناء بدت له قضْبان سجنٍ رابضٍ فأشاح عنكِ هائماً حتى إذا ما صدّه المطرُ ارْعوى وإليكِ آب مسلّماً كفَّ المدى * * * حبي لكِ أمسى فَراشَ الضوء جمرُ الموتِ يجذبُه ويشتعلُ الجناحُ فيستحمّ بماءِ آلهة القضاءِ تمدُّه بأصابعٍ قدريةٍ نردٌ بخنصرِها *** حبي لكِ أخفى دواوينَ البلاغة والبديعِ ونغمةَ الأوتار تحت الصخْرِ راح يقلّبُ الأحجارَ بحثاً عن ثمارِ البرْدِ يَخْزنُها إذا ما هدّه التعبُ ارتمى متضرّعاً لشفاهكِ لكنّكِ، والحَبُّ يقصمُ ظهْرك، لم تسمعي *** حبي لك ملأ الوهاد رَشَاً عِطاشاً تملأ الكأس الطّموحَ دماً فإن خشيَ الذئابَ ترومُها اقتربَتْ يداه ترومُ ماءَ النبعِ وارتعدتْ ذُعوراً إذ رأت في الماء وجهَ الذئبِ يقتربُ *** حبي لك ما كان أن يحيا بلا شِعرٍ يَهَبْه جَوانحاً يسمو بها يتقمّص العصفورَ والفَراشَ والنملَ الحثيثَ، وبعدَها إن ألبستْه معاركُ الأيّام جلدَ الذئب لمْ تلبث إلى جنّاتِ صدركِ روحُه تسعى

لقمتان لا أكثر

2006-04-13T17:26:00.000-02:00

يتوقف عالمي اليوميُّ الاعتيادي جداً، كي تغرف أصابعي عبقاً طفولياً طافحاً،

وتتاخم شفاهي أغنياتٍ تلتها أعينٌ في زرقة الأحلام.

هاهي الشمس تخترق مطر اللحظة، لتسكب فوق جلدي حكايا جدّتي العمياء،
ولتطلق السماء آخر توجعات مخاض قوس قزح. تتوافد الأصوات شاردةً إلى
الصالة الباذخة، ويعلن المساء المداري بدء طقوس عرس ابن آوى. ينتهي العرس، تتقلّص المدينة، أشعر بضيق المكان، أتصبب عرقاً بارداً.
تختفي الحافلات بغموضٍ على جسور لا إرادتي. وتحت اصطكاك أسناني،
تتهاوى المباني الشاهقة. ترتعد فرائص الأفق، لتنتعظ خلف الخوف جبال
من الصخور البيض. تبتلع الشوارع العريضة مراكب الرحيل، وتستل من
جوف الحوت المنتحر مركبها الأخير. يتضاءل المركب ليصبح صحناً خشبياً من الشرق البعيد، وإلى جانبه، تنظر
بسخرية إلى وجهي الذاهلِ لصاقةُ الثمن الباهظ على قطرميز الزيتون المستورد.

أتناول لقمتين لا أكثر، ثم أعود بسرعة إلى حافلتي الصباحية.

أين المفر؟

2006-04-10T16:17:00.000-02:00

لن أعرف الفرار يا أمّاه فها أنا أسير جلدٍ خيّطته - على ضياء سراجها الشحيح - جدّتي أكاد أسمع فأس جدّي تحطّب العظام من قلوع الصخر تحت البرد والمطر ليكسوه أبي لحماً أخزنه كديّة أبديّة عيناي كوكبان يسرقان الضوء من نجومٍ قد لهت - بالأمس - فوق سطوح حارتنا وضحكتي - في طرفها - يلوح طيفٌ غامضٌ

لحبائلٍ معلّقةٍ بأذرع الزيتون هذا دمي الذي ترين في عروقي : لا أزرق، لا أحمر إن هو إلا أغانٍ تردد رائحة الزعتر أمّاه، ثمّة وشمٌ فوق زندي أخبريني - قد نسيتُ- متى رسمتِ هذا الوشم؟ وذاك الجرح في كفّي ، أتذكرينه ؟ أبشري، أمّاه، قد شفى لكنه اليومَ أخرج لي من تحت طبقاته حصىً بيضاءَ أعرفها حصىً لدروبٍ

لم تزل خطاها أسطراً مكتوبة

على سويداء الجبين

ستمطر هذه الليلة

2006-03-31T12:50:00.000-02:00

وذاك وجه محاربٍ تَعِبٍ يتّكئ على ترسٍ من قصائدَ منّمقةٍ وتلك فتاةٌ قصّت شعرها الغجريَّ حداداً على حبٍّ لم ترهْ وذاك نمرٌ مرقّطٌ قد فارق الجَمال والفرائس يمرُّ مسافرون يحلمون بالثراء والخلود أتابع رحلتي ثمّة أطفال يتحلّقون حول قدْرٍ وأمٌّ تحرِّك حجارة الانتظار في بقعةٍ تغزوها الزرقة شيئاً فشيئاً يتلاشى تنّينٌ بسرعة انطفاء الطفولة أخفض رأسي، وأنظر إلى الوشم على ظاهر يد أبي تهزّ كتفي في عتبٍ أرفع رأسي إلى ذلك الوجه المغضّن يفترّ عن جملة تقريرية جديدة: هيّا بنا نتابع دفن البذور ستمطر هذه الليلة!!

كيف تاخدني المدينة

2006-03-29T12:21:00.000-02:00

وبضيع.. وبلاقي إيام ت دوبل الزحمة والضجر، وصفوف سيارات ما بتخلص بفوت بأزقة مالا وجه، نسيوها عمّال الطرق، وماكتبوا، ولا بمطرح، كيف تاخدني المدينة، ولا كيف رح إرجع طلعة بعد نزلة، نزلة بعد طلعة، وبخاف وقّف إسأل شي حدا بتخوّف وجوه المدينة، وال ما بتعرفو بيخوّفك أكتر إيام كنت ضيع، دور.. دور.. دور وإرجع بعد الوقت والخوف والحيرة.. لاقي حالي واقف من جديد.. بنفس هديك الزحمة وبنفس الضجر وبنفس صف السيارات اللي لا خلص، ولا بعمره رح يخلص وإيام، متل الكذب، بعد شوي، بعد كتير، لاقي طريق جديد، أحسن ألف مرّة وقول: معقول؟؟ صرلي عمر مو منتبه، صرلا عمر مستعبدتني هالدرب، بستنّى لو تستنّى، وبروح إذا بتروح وكلما تقرّر تعبّي صالونا زوّار المسا، إنطر أنا دوري، وبيجوز عمره ما يجي هون بهالنفق، ما فيّي دوبل ع حدا بيجوز كون شايف، وبيجوز غيري لأ بعد النفق في ضوّ، بستنّى بتذكّر بمرّة طوّل كتير النفق، وقصروا خيطان الصبر ومع إنو كان العتم أكتر، وسامع صْوات ومو شايف حدا طلعت!!! زعق حدّي الموت ما فهمت شو صار، لكني بتذكر أكيد إني بعد بشوي.. لاقيت حالي بمطرحي م تْحمّم بضوّ الحياة

من شيخ البحر إلى سندباد

2006-03-28T18:11:00.000-02:00

قصيدة Remarks to Sindbad from the Old Man of the Sea

للشاعر العراقي سركون بولص تجدون هنا القصيدة بالانجليزية وهذه قراءتي-ترجمتي لها: شو!! لحّقِتْ تتعب؟ انسى البحر لا عاد تحلم بالسفن، لا عاد تحلم بالتجارة، آخر الرحلة أنا هيكي متل ما أوّل الرحلة كنت كل الدروب اللي كنت تقطعها راصفها أنا وبتشتكي؟!! ما أتقلك - بتقول - ع كتافي!! هادا لإني فوق تقلي حامل تقال الدّهِرْ ومالي حدا غيرك ت يحملني بهالرحلة ما بين الليل ونهاري بعرف رح تجرِّب إنِتْ، مرة بعد مرة، الهرب ببنامك تكسّرلي راسي بالصّخر ع جثتي ترقص سِكِرْ لكن إذا بعدين شي مرّة فتت وحدك ع هالغابات ما في حدا إلا العتم م يحاوطك وبكل همسة، تلتقي حيايا وفحيح وسمّ وفخاخ ورعب يصفوا مصيرك وين ما بتروح لا تجرب بمرة الهرب انسى البحر لا عاد تحلم بالسفن لا عاد تحلم بالتجارة، اليوم عقدة انتظاري فكفكت من هلّق وطالع، ع ضهرك احملني مشي ت نستكشف سوا يا سندبادي هالجزيرة إنت وأنا كإننا واحد

ضَلّوا اسْكَروا

2006-03-21T23:54:00.000-02:00

ضَلّوا اسْكَروا، كِلِّ الوَقِتْ وَحْدو السِّكِرْ، فيهِ الْجوابِ السَّرْمدي ت تْبطِّلوا تحسّوا بأوْزارِ الدّهِر عَ كْتافكون مَ تْشِدّكون صوْبِ الأَرِضْ ضلّوا اسْكروا كِلِّ الوَقِتْ هَلَّقْ بِشو رَحْ تِسْكروا بالخمر أو بالشِّعْر أو بالفضيلة، قَرِّروا عَ كيْفكون بسِّ اسْكروا ضلّوا اسكروا حتى الْ إذا بتْفيقوا بِمْدارِجْ قَصِرْ أو عَ الْعِشِبْ أخْضرْ عَ ضِفِّةْ شي نَهِرْ يَمّا بْغِرْفة عَتًّما طول القَهِرْ لمّا السِّكر بيكون قَرَّبْ ينْطِفي لوْ تِسْألوا للرّيْح، للْموجات، لنْجوم السَّما، للطّير، للسّاعة لَكِلْشي عَمْ يمْشي، عَمِ يْغنّي، عَمِ يْرتِّل شِعِرْ لو تِسْألوا شو صارِتِ السّاعة؟ رَحْ تِسْمعوا هالرِّيح، هالموجات، ونجوم السما، والطير والساعة م تقلِّكون صارِ الوَقِتْ وَقْتِ السِّكِر قوموا اسكَروا، لا تْقَصِّروا بالخمر أو بالشعر أو بالفضيلة قَرِّروا ع كيفكون، بسِّ اسْكروا

ضلّوا اسْكروا

مقتبسة من قصيدة نثرية للشاعر العظيم بودلير

خلي القلب صافي

2006-03-10T10:24:00.000-02:00

متعكّر خيالي وعمِ يْصفِّط صور مدري القلب تعبان أو حسِّ بْخطر شفت السمك طافي ع وجّ الميّ شفت الشجر عريان مالو فيّ وديان عم تبكي وِحْقول عم تشكي والغيم ضانن بالمطر دقّوا نواقيس الخطر صحّوا البشر.. صحّوا البشر مفزوع من نومي فقت شبّاك لهمومي فتحت شفت السما هيّي السما وغيوم بيضا ترسما وسْهول خضرا، والنّهِر غنيّة فجّرها الصخر وِصْوات عم تنده: خلي القلب صافي ... خلي السما زرقا هالكوكب الدافي ... بالحب رح يبقى خلي القلب صافي ... خلي السما زرقا هالكوكب الدافي ... بالحب رح يبقى

حتى أنا بتعب

2006-03-09T18:34:00.000-02:00

حتى أنا بتعب بيجوز ما بتتصوّرا معقولة تزهق إمّ من طفلا الرضيع وتملّ من ورد السهل شمس الربيع لكن أنا لا إمّك ولا شمسك ولا حروف شرشرتا الكتب ماني خيال الشاعر بيشطح كذب ت بدمّي بتشكّل صور وبهمّي بتخبّي قمر حاجي بقى تهرب من عيون الشقا وتشدّ آلامي وتر متلك أنا في همّ سارق فرحتي في غيم حابس بسمتي تعبانة من ركض المدى بحلم معك، وبفيق ما بلاقي حدا

الضجر

2006-03-08T00:59:00.000-02:00

يا صاحبي يا بو الجدايل سود وسنان الدهب شو رجّعك لاطي كِنِتْ ع بْواب كلّخْها التّعب فايت مِتِل دود الخشب تَ تْفَتْفِتِ بنامي الهني تِرْخي خريفك ع الدِّني بتذكّرك من أوَّلِ حْكاية ولد ربَّط حَبِلْ عِمْره بْوَتَد حارة بعد حارة مشي مدري غشي مدري شرد فتّح عيونو ع الصِّبِحْ لاقى الصِّبِحْ غير الصِّبِحْ وِفْراشو برّات البلدْ بتذكّرك تتمسخر عليّي ع هبّات الفرح كلما بْكَهِفْ أحزاني شي ضوِّ انْفتح حتى الإجت ساعة صحو غفّيتك وصبحي انجلى جنِّ الحلا صاروا الليالي شموع وعطور وقمر حنّ القدر فكّرتك الماضي صِرِتْ شو رجّعك هلّق ما فيّي اتحمّلك ما عادت القصّة أنا إنت وأنا صار في ضنا هالمرّة ما بتقبّلك بدّك ع شرياني وكياني تفتري يا بموت يمّا بقتلك

ضيّعوا الورقة

2006-03-07T12:11:00.000-02:00

يا إمي ضيَّعوا الْورقة نِسوني وْجَدَّدوا الفِرْقة مِتِلْ عِمْنَوِّلِ بْقِلِِّك لَسِنْة الْجايي رَح نِبْقى * * * يا إِمِّي ضَيَّعوا الطَّاسة عَ صَحْنون دَحْرجوا راسي أنا الْما عْصيتِكِ وْيمكن عَ قَدِّ مْحَبِّتِي عاصي * * * يا إِمِّي مو ذَنِبْ عيني مَوَاسِمْ بينِكِ وْبَيْني إذا بْتِتْمرِّي بِكْفوفِكْ أَكيدِ بْتَعْرِفي وَيْني * * * ما فيِّيْ سَكِّتِ عْروقي قَصَبْ أنّاتو عَ شْروقي صدى الرّاجِعْ خَنَقْ صَوْتي تَلِج بيْشَعِّلِ حْروقي * * * يا إمِّي لا دَهِر باقي وَلا بيِخْلّدوا وْراقي دَرُوا الغِرْبان بَحْصاتي وْطَريقِ الرَّجْعة لو لاقي

كل الحكي

2006-02-16T12:00:00.000-02:00

كل الحكي ... ونهر البكي ... ما رجّعو ... ألله معو حبي إلو ... ما بدّلو ... عصف الهوا ... ومرّ النوى بدعي لألله يسعدو لو عني راد وبعَّدو وِن كنّو ملقانا قدر يا ربي قرِّب موعدو كل الحكي ... ونهر البكي ... ما رجّعو ... ألله معو حبي إلو ... ما بدّلو ... عصف الهوا ... ومرّ النوى يا غربة دمعاتو ارحمي وبدربو أفراح ارسمي لو جرحو بالمنأى شفي ع ذكرنا لا ترغمي كل الحكي ... ونهر البكي ... ما رجّعو ... ألله معو حبي إلو ... ما بدّلو ... عصف الهوا ... ومرّ النوى ما عندي أغلى من الولد إلا الولد من هالولد يا ربي كحِّل ناظري بوجوهن تضوّي البلد كل الحكي ... ونهر البكي ... ما رجّعو ... ألله معو حبي إلو ... ما بدّلو ... عصف الهوا ... ومرّ النوى

مالي نفس إحكي

2006-01-16T14:59:00.000-02:00

مالي نَفِسْ إِحْكي مالي نَفِسْ إبكي مالي نَفِسْ حتّى ع شي مخدّة ْ حِلِمْ إِتْكي ضايع مابين الدَّمعة والبسْمة بين السَّما والأرْض في كلمة والكلمة محبوسة... وِمْضيَّع المفتاح يا نجمة لا تْنوسي... لاقيلي ياللي راح مالي نفس إحكي مالي نفس إبكي مالي نَفِسْ حتّى ع شي مخدّة ْ حِلِمْ إِتْكي سِهْيان عَم دعِّس عَ نِجْماتي بَرْدِ الحِزِنْ عِشْقان خطواتي نِجْمة بَعِدْ نِجْمة ... عم تنطفي الأحلام واللي حَمل همّي ... عم تِطْحنو الإيام مالي نفس إحكي مالي نفس إبكي مالي نَفِسْ حتّى ع شي مخدّة ْ حِلِمْ إِتْكي صوتِ المطر بيدقّ ع بوابي حَبِّةْ عِطِرْ عِلْقانة بِتْيابي شو بَعْرُفو هالصّوت.. مِتْلِ الصَّخِرْ باقي شرشي اللي ما بيموت.. لو ماتِتِ وْراقي مالي نفس إحكي مالي نفس إبكي مالي نَفِسْ حتّى ع شي مخدّة ْ حِلِمْ إِتْكي

وِبْتِرْجَعِي

2005-11-29T12:09:00.000-02:00

وَقْتِ الْ ما بِتْكوني مَعي ضَلِّ النَّهارِ بْمَطْرَحو أوْ غابِ مَا بْتِفْرُقْ مَعي كلِّ الدَّقَايِقْ وِالْحَقَايِقْ وِالأَماكِنْ وِالطُّرُقْ برَّه الوَعي كلّ اللي تارِكْلي النَّبِِضْ عِشْقي إِلِكْ بَسِّ العِشِقْ وَحْدو ما بيْكفِّي.. ما بيدفِّي.. ما بيرِدِّ البَرِدْ بَدِّي بجِسْمي تضّيْع ديّاتِكْ بدِّي عَ صِدْرِيْ تْموتْ نّهْداتِكْ إِرْجَعْلِكِ، تْكوني مَعي وَقْتا مِتِلْ رَجْعِةْ ربيعِ بْتِرْجَعي عَ شْفافي بيْفتِّحْ زَهِر عَ زْنودي بيْمَشْوِرْ عِطِر بيْجِنِّ عَنْقودِ العِنِبْ تَ بْكَفِّكِ يْبَلِّشْ عِمِرْ عم تسْمَعي؟ عم تسمعي؟ كلاّ عَصِرْ بيْطيْبِ بِجْرارو الْخَمِرْ بِرْجَعْ لَشِلاّلْ السِّحِرْ وِبْتِرْجَعِي

الحب الأول

2005-11-11T12:01:00.000-02:00

بِتْذكّرو هاكِ الْمَسا، مِتْل الْ كَإِنّي عَايْشو هَلّق لَمِّن قَبِلْ ما يْبَيَّنوا النجمات بيّنتي نجمة وحيدة بالسَّما وِمْزَوْزَغِ عْيوني النَّهارِ، وْدَوْبْني شِفْتِكْ كِلِّكْ خَجَلْ عَ الباب وِقَّفْتي دِقّيْتي ع بْوابِ الحِلِمْ، فِتّي دِيّاتِكِ انْمَدّوا عَ حِزْني فَتَّحوا قْفال اللِّغِزْ فَكّوا قَميصِكْ عَ الْهَدا وِ تْفَرْفَطوا الأَسْرار عَ تَخْتي يَوْمَا ما بَعْرِفْ كيف ديّاتِك مَ تِرْجُفْ حَلْحَلوا لْساني ْعَ مَغْزَلِكْ هالماحَدا غَيْري أنا شافو غْزَلْتيلي مِنْ خَوْفِكْ عِمِرْ تاني صِرْتِ الصَّبي اللي بْيِعْشَقِ وْبيحِنّ إِضْحَكْ لَزَهْرِ النَّرْجِسِ وْ زَيِّنْ قَمِيْصي، وْدَفْتَريْ، وْإِسْتَنْظَرِ النِّجْماتْ لمّّن إِجُوا دوَّرْتْ ما لْقَيْتِكْ مِدْرِي انْطَفَيْتي، أو أنا بِبْنامي خِبَّيْتِكْ

حُبّي إِلِكْ

2005-11-04T11:26:00.000-02:00

حُبّي إِلِكْ ما غطّ عَ غَفْلة زَقْزق ع شبّاكِك فَتَحْ، قَرَّب قَطَفْ نَقطة عسَلْ مِتْل الْ لَمَحْ خَلْفِكْ قَفَص، غَيَّرْ طريقو وْ غاب جاهِ الشِّتي، هَدّى وْرِجِعْ لاقى المدى عم يتِّسِعْ

حُبّي إِلِكْ صَفّى فَرَاشِة ضَوّْ شَدّو الجَمِرْ، رَفْرفْ تَ حَرْوَقْ جانِحو وَقْتا عِرِفْ ما بْتِنْجدو إلاّ أَيادي الغَيْب آمَنْ بِآلِهْةِ العِشِق، مَدُّوا أَصَابِع مِنْ عِمِرْ عَ الْخُنْصُرِ اتْدّحْرَجْ زََهِرْ
حُبّي إِلِكْ ضَبْضَبْ دَوَاوينِ الشِّعِرْ خَبّى الوَتَرْ تَحْتِ الصَّخِرْ بَحْبَشْ عَ قَمْحات الشِّتي ، زقُّون إِلِك حبِّة ورا حبِّة لمَّا تِعِبْ نَادَاكي تَ تْضِمِّي الجِرِحْ لاقاكي مَ تْزِقِّي الْقَمِحْ
حُبّي إِلِكْ ملاّ الحِرِشْ غِزْلانْ عِطشانة تِسْقيه بِعْيونا طُمُوحُِ وْدَمّ إيْدو عَ قَلْبو عْلَيْها مِنْ دِيب الْعَطَشْ والجوعْ قَرَّبْ عَ نَبْع الميّ تَ يْعبّي
بْقَلْبو لَمَحْ في ديب مِتْخَبّي

حُبّي إِلِكْ ما كان فيه يْعيش لَوما الشِّعر مَ يْرِدّ لَجْناحو الفَضَا حُبّي إِلِكْ هوِّي أَنا، عَصْفور وِفْراشة وْنَمِلْ حتّى انْ قََلََبْ وَقْتِ الْمَعَارِكْ ديب بْصِدْرِك ع آخِر هَالْمَسَا بيْطيب

بيمرق عليّي العيد

2005-11-02T10:58:00.000-02:00

بيمرق عليي العيـد صوتي منجرح.......ما في حدا ت عايدو إلا الصدى ما في أهل عدّون ع صابيعي الصبح......ت يكمّـلوا خرجيتي ورد وندى لا وْشوش تضحك ضحكتا بلون القمح...لا قْـلوب تتصافى وأماني تنهدى بْنشقى بهالغربة تَ نِتْلاقى الفـرح.......لمّـا بْيِجي يوم الفرح ما في حـدا يا ريت لو إرجع طفل عمري هني......وكل الْ جنيتو يروح يدريه المدى

حب من طرف واحد

2005-11-01T10:01:00.000-02:00

شو همّ لو حبيت ماانْحبيت نفس العِطِرْ بالليل بيسافر نفس الوَتَرْ مَشْدود ع الآخر شي تِلْمِسو بيْجِنّ بيرَتِّل شِعِر نفس القَصَبْ مَبْحوح ما بْتعرفْ كنّو مَ يشكي للقَدَرْ ولاّ مَ يستَقْبِلْ مَطَرْ يِمْكِن إذا بِزْعَل عَ شي إنّك إِنِتْ برّات هالجنّة ما تحسّ شو عم حسّ إنك ما تِسْتَطْعِمْ مَعي هالسِّكَّر الرّشّو الهوى ع شْفاف إيّامي إنك ما تَعْرِفْ يا قَمَرْ شو بْشوف بِبْنامي كَنّك ما دِقْتِ الحبّ بِدعيلك بِنَارِ العِشْق روحك حَرَام تْضَلّ بردانة وقتا إذا بْتنحَبّ.. ما بْتِنْحبّ صدّق يا أغلى الناس ما في فَرْق

حب عابر

2005-10-28T11:00:00.000-02:00

كانِ الْعِشِق يَوْما مْعَذّبْني قاطِعْ عَنِ وْراقي الْهَوا وِالضّو جيتي بْطريقي بْنَفْسَجة وِمْتَوَّجة بالشَّوْك أيّا طريقٍ لْ وَصَّلِك عَ جْنَيْنِةِ جْروحي؟ أيّا حنينِ لْ سلَّمِكْ روحي؟ مِنْ عَلَّمِك.. مِنْ وَصَّلِكْ عِنْدي؟ أيّا زَهِر.. أيّا عِطِر.. أيّا رَوايحْ هيل وَدّوكي؟ ت غفيتي ع زندي عم بسأل وبعرف مَ رَحْ أعْرِف بَسِّ لْ بَعِرْفو اللّيل مِنْ وَقْتا انْدلق عبّا الْفَجِر كاسات من خَمْري وبنار من جَمْرِ الهوى دوّب - ولو نتفة - تَلِجْ عِمْري

مجبور يومي بالأمل

2005-10-25T17:37:00.000-02:00

كنا م نستنّى العشب جابوا الحرب كنا م نستنّى الشتي جابوا الطمي يبّس صِدِرْ عِشتار تمّوز انْخصى هدّوا الجِسِر زتّوا الحِلِم بالبير نحْروا اللي جرَّب ينْتِخِي يرخي الحَبِلْ هِرْبت غيوم مخصّبة.. سدّوا السما ما عاد في مَنفد متل الفرس هربانه صرنا بْلا طريق وْلا مدى حتى إذا مرّات نتلفّت ورا ما في حدا

إلا كَلِب جربان م يفتّش ع عضمة بالخراب شي فتّحوا بواب السِّجِن هجّت بشر.. فاتت بشر نفْس الوجوه الكالحة ونفس السراب شي فتّحوا بواب الوطن فاتت بشر.. هجّت بشر شي فتّحوا بواب الإله تْبَهدلوا الضّحكات ع شفاف الرباب وتزنّرت سالومي بالساطور والعفّة صفّت مسافات النفي أكبر

...

... بس الحقيقة الباقية بتضل إني أنا بقيان إتْلاقى بْبَشَر متلي في عندون وعندي أمل ت نعيش أو ت نموت حتى نعيش

هجرة

2005-10-22T03:18:00.000-02:00

في شي غلط كِلْشي غلط يِمْكِنْ بسِّ الْغلط فوق الغلط خلاّني لاقي الصحّ خلاّني أعرف ليشْ جِلْجامِشْ سَلَكْ درْبِ الْعَتِم تَ بْقلبو لاقى الضوّ إنتي بتعرفيني إذا بدّي لَبَنْ عَصْفور رَحْ لاقي وقت الْ مَ بدّي موت رح بِبْقى، وْأنا باقي لكن إذا بلّش حنين الغيم ينساني وِتْحَرْطَموا مْواجي ع صخْرات الصَّبِرْ ما ضلّ ع كْمامي عِطِرْ وقتا رَحِ بْقلِّك خلص ما عاد بقّى بهالعُمِرْ إيّام تستاهل غلط *** طيِّب إذا إنتي مَ عد بدِّك حدا حدِّك حتى اللّي كانوا يصابِروا قدِّك.. مَ عَدْ بدِّك شو بسوّي بِشْروشي لَكَنْ شو بِعْمُلِ بْكفّي اللي ما لاقت قمِح شو بعْمُلِ بْدمِّي اللي ما لاقى جرِح شو بعمل بليلي اللي ما لاقى الصِّبِح مو باقي إلاّ صوت دعْساتي لآخرْ هالعَتِم ماشي ع ضوّ نْجوم ذاكرْتي صفِّط صُوَرْ وِذْنوب ومشاوير وِعْيون مَ تْشتّي *** حزني أنا بهالليل من حزنك خوفي مِتِل خوفك نبضي صدى نبضِك سامع أنين الريح ع بْوابي شفتي إذا ما تْسَكَّرِ الشِّباك ع الآخر كيف الهوا بيئِنّ ع طْرافو متل الولد ياللي انسرق منّو الفرح صفّي نهر مالو أرض، مالو سما، مالو حدا حتى الحضن، بعدو الحضن، بعدو الحضن يِصْفى صَخِرْ داشر بِهالنهر اللي ما بيعرف مدى

ورق

2005-10-12T03:57:00.000-02:00

قِـلــتــي: خــلـــص كلشي انكتب بيناتنا ماضي ومرق كل اللـي باقـي هلّق شويّة ورق

رح إحرقون

ونشـرتـي مـوتـي ع الــورق مــن يومـتـا قلـبـي احـتـرق وبـمـطـرحـو اتـعـبّــى ورق

يا شامة دليني ع طريق الشام

2005-10-10T23:54:00.000-02:00

يا شامة دلّيني .... عَ طَريق الشّام

عَ تْرابا ودّيني ... أَحْلى مْنِ الأحلام

***

رِدّيني لَزْهوري .... لَعْصافير الدّوري

لاقي الوَرْدِ الجوري .... إشكيلو الإيّام

***

ردّيلي الزَّيْتونة .... وِوْراق اللَّيْمونة

هالشَّوْقِ البِعْيوني ... غَنّيلو تَ يْنام

***

زادوا سْنينِ فـْراقي ... وما بَعْرِفْ شو باقي

حتّى إِرْجَعْ لاقي ... أَحْبابي يا شــــــــــــام

***

يا شامة دلّيني .... عَ طَريق الشّام عَ تْرابا ودّيني ... أَحْلى مْنِ الأحلام

***

من وحي أبو علي بودلير

2005-09-28T19:41:00.000-02:00

من زمن طويل كنت أقرأ بودلير (أزهار الشر) وخطرت لي ترجمته بشكل شعر، ولكني هذه الأيام بعد أن أعدت القراءة، أشعرني بودلير أنه زجال منبري لمن يود قراءة الأصل بالفرنسية وترجمته الانجليزية، هاهو الرابط وهاهو اقتباسي : بْليلة تغنّى الخمر جوّه الخوابـي وقـال

رغم الحبس والأسى وبرد الحجر عندي من ضوِّ روحي أنـا بهديـك هالمـوّال

يا رفيق ما لو حدا حبّـو صـدق قـدّي *** سقيوا كرمهم عرق ودموع أحلى النـاس

بعرف أنا ع العنب شو جدّوا واجتهـدوا تعبوا ت وهبوا حياتي روح من ألمـاس

كرمال عينون أنـا المعـروف رح ردّو *** قديش بفـرح إذا دمّـي انهمـر شـلاّل

جوّه صدر منهلك تعبـان مـن شغلـو ما عاد إرضى البرد بجرار من صلصال

بدّي بصدرك انقبر مافـي قبـر متلـو *** كرمال يضْوي الفرح بعيون مين حبّـك

رجِّع لتمّ الصبي بسمـة طفـل فرحـان رح صير ترياقك ورجّـع دفـا قلبـك

سلّم حياتي إلك يا رفيقـي يـا إنسـان *** بجوفك يا شاعر ع أكل الآلهة مفطـور

دمي انهمر بالشعر فكرك نـزل شـلال وحدو العشق للشعر ببدر شتايـل نـور

تطرح ورد للسما يعلا ت خـدّا يطـال

***

قصيدة أخرى، وربما يكون هناك قصائد قادمة، هي طائر القطرس، تجدون الأصل على هذا الرابط، وها هو اقتباسي:

إيام أهل البحر بدّون ت يتسلوا... بيصيّدوا القطرس طْيور البحر هالجانحا بعرض السما، بيتسابقوا بهالجوّ بيضلهون، ما بيزهقوا، عم يلحقوا الأسفار.. خلف السفينة المارقة فوق الألم والنوّ *** أول ما توقع هالمُلُوك الجوّ ع رصيف السفن شو مبهدلة شوضعيفة بتصفّي حتى جناحا الأبيض الجبّار بيصفّي سجن ما بيتركا خطوةْ مشي تكفّي *** ما أضعفو وشو كان فوق السّما كلشي إلو ما أبشعو وشو كان من قبل ما يوقع حلو بحّار بيطفّي ع منقار الضحيّة نار غليونو وتاني ع مشيو بيضْحك وبيقلّد جنونو *** متلك أمير الغيم هالشاعر وسط العواصف ما سأل عن شي لكن ع هالأرض انتفى حولو الضحك داير وجْوانحو ال قدّ السما عم تمنعو يمشي ***

من وحي أشعار أطفالي

2005-09-23T14:58:00.000-02:00

هي مقاطع صغتها من كلمات وعبارات قالوها وأبدعوها.. طبعاً، أطفالي لا يكتبون الشعر، ولا يعرفون حتى كلمة الشعر، ولكن بين الفينة والأخرى يقولونه دون أن يدركوا ذلك: - أمي - ع شغلك روحي يا إمي أنا كبرت وصرت بعرف بَعِدْ مَ تخلّصي شغلك أكيد بترجعي إمي *** - جدّو - يَ بيّي جدّي في عندو شجر زيتون وصنوبر إلو الوردات والتلة يَ مَ حْلى عيشتو جدّو *** - مرجوحة - شفت ببنامي مرجوحة وأنا مَ تْمرجح وغنّي إجا بيّي دفشني شوي لجنب الغيمة وصّلني

***

بين الشعر والغناء

2005-09-16T14:16:00.000-02:00


هل يمتلك الشعر العامي من الأدوات ما يمكّنه من الوصول إلى تقديم مادة ثقافية شعرية ركيزتها
الأولى هي الصورة والتعبير؟ أم أنه سيظل مراوحاً في منطقة الفن الشعبي المرتبط تحديداً 
بالموسيقى المباشرة، بالشكل المعروف الذي يحض على الغناء والطرب؟؟

بداية، للموضوع شقان: الشق الأول هو موضوع المزاوجة بين الشعر (المحكي في حالتنا) 
والموسيقى بأوزانها وإيقاعاتها الناظمة للحروف والقوافي والكلمات، والتي تتبع أوزاناً 
عروضية تختلف في صرامتها بين التفعيلات المجزأة والبحور الشعرية المعروفة.
الشق الثاني، حول قدرة اللهجة المحكية، وبغرار الفصحى، على تكوين مادة شعرية جديدة لا
ترتبط شرطاً بالموسيقى المباشرة.

في الشق الأول، اسمحوا لي أن أبدي دهشتي من هذا التطرف الذي أراه من بعض شعراء 
الحداثة إزاء مزاوجة الشعر بالموسيقى التقليدية، تلك التي تتطلب من صائغ الكلمات أن 
يضعها في قالب من الصنعة موزون ومقفّى. ودهشتي لا تتأتى من إيماني بضرورة وجود هذه 
المزاوجة، بل من ثقتي بأن الجيد من الشعر يمكنه أن يأخذ أي قالب، سواء ارتبط هذا الشعر 
بالتفعيلة والوزن أم تحرر منها
طبعاً، لا أتحدث هنا عن أشعار هي في النهاية صف كلمات بشكل رياضي تخرج علينا في
 النهاية بشكل قصيدة، وهي أبعد ما تكون عن الشعر. لاحظوا معي أن صف الكلمات بشكل حر 
فيما يشبه القصيدة الحديثة وارد أيضاً. العبرة إذاً ليست في الشكل، بل في المضمون.
في الشعر المحكي، كما في الشعر بالفصحى، هناك قصائد مغناة تذوب رقة وانسياباً، وتقدم
 مادة شهية للفكر بالرغم من ارتباطها الوثيق بالوزن، لا بل حتى بالتفعيلة العروضية، ولعل
التجربة المصرية في هذا المجال هي الأقوى والأبرز.

كمثال على هذه القصائد، سأضع مقطعاً من قصيدة للشاعر مجدي نجيب من ديوان صهد الشتا:

مركب ورق ..
خدني معاه .. طفت ف قلق
وشربت آخر الليل عرق
ورجعت كلمه ف وش دنيا من نحاس
صدّت عليا بسمتي
برضك أنا ..؟!
لكن خسرت الريح وصاحبي و القمر
وخسرت حتى حسرتي

كما نلاحظ، فالشعر هنا يلتزم بالتفعيلة (مستفعلن)، ويلتزم بالقافية، ولكن هيهات أن تكون
هذه الأبيات مجرد صف كلمات أو مجرد دعوة تقليدية للطرب بطرقه التقليدية المعروفة.

بل ربما من الطريف هنا أن أذكر أن أشهر الأغاني المسلوقة التي نعرفها، والتي وضعها 
كتاب للأغاني لا يمتون للشعر بصلة، لا تلتزم في حقيقة الأمر إلا بقافية مصطنعة، وأوزانها 
مكسورة تماماً، وتعتمد في تلحينها على مطمطة بعض الحروف والمقاطع، وهذه عموماً 
أغنيات وكلمات لا تعمر طويلاً.
في المقابل، بقيت في ذاكرتنا جميعاً أغنيات كتبها شعراء ممتازون كرائعة ميشال طراد 
( رح حلفك بالغصن يا عصفور) ، والتي غناها كما هو معروف الرائع وديع الصافي، وهي
 قصيدة موزونة، تتبع مجتزئات بحر الرجز أيضاً.)تجدون على هذا الرابط تحليلاً ممتازاً لهذه 
الأغنية من جهة البناء الشعري والموسيقي)

نصل الآن إلى الشق الثاني:

هل ارتباط القصيدة المحكية بالموسيقى إلزامي لهذا الحد؟ وهل خلا ديوان العامية من تجارب 
تركّز على الفكرة والصورة والموسيقى الداخلية، ولو على حساب الموسيقى التقليدية بما تتطلبه
 من التزام بالوزن والقافية.
أعود إلى كنز مجدي نجيب، فأضع بين يديكم هذه الكلمات:
حبلوا ف سابع يوم .. مش تاسع شهر
وف كل جنازه ..
اتلموا جنب الميت ..
ولا شاوروا ف يوم ع البطن
يمكن كانت بنت ..؟؟
لأ .. كان واد ..
كان عيّل عمره ما راح الكُتاب
لكن بيموت م الحرف
حبلوا ف سابع يوم .. مش تاسع شهر؟؟
ولا شاوروا ف يوم ع البطن
يمكن كانت ليله ف حضن القهر
الخوف عيّل ولدوه الرجّاله ؟؟
إزاي ..؟ ماعرفش
هل يستطيع أحد أن يدّعي أن هذه الصور الرائعة قد خضعت لقيود الوزن والقافية؟؟ أليس 
العكس هو الأصح؟؟ وأن الإحساس بالوزن، وورود القافية جاءا فقط في المكان الذي لا يحول
 دون إظهار الصورة؟؟


من تجربتي القصيرة والمتواضعة، لاحظت أمراً نغّص عليّ فرحتي القصيرة ببعض النصوص
 التي كتبتها (وهي عموماً باللهجة المحكية)، هذا الأمر هو أنني لم أستطع أن أصوغها في لغة
 أخرى دون أن أفقدها  ما لا يقل عن خمسين بالمئة من قربها من الشعر!!

أذكر أني قرأت يوماً أن مسألة الترجمة هذه كانت من العوامل التي حفزت بعض شعراء الحداثة 
على الخروج من سطوة اللغة، والتركيز على بدائل أشد ثباتاً.

منذ وقت ليس بطويل، قرأت بعض أشعار أدونيس باللغات الثلاث، ولا أعلم إن كان هو أم آخرون 
من قاموا بالترجمة،  ولكن النصوص كانت كلها تفيض شعراً، والمثير للدهشة أكثر أن الترجمة
 كانت شبه حرفية!!!

أعتقد أن جزءاً من هذا التناقض بين الشعر والغناء هو مع الموسيقى، ومع الغناء تحديداً، قبل
أن يكون مع الشعر، فالغناء العربي لم يخرج بعد من قوقعة المطرب والكورس، المغني 
والمرددين، وهذا ما يخلق دعوة دائمة إلى صوغ قصيدة تستجدي هذا الأسلوب.

يقال أن سيد درويش كان يلحّن مقالات الجرائد، ولا أظن أن الأذن تنتبه إلى أن أغنية المحبة التي
شدت بها فيروز هي نثر صرف كما هو معروف.

فهل هذا العناق المؤجل بين الشعر (بصرف النظر عن لغته) وبين الغناء، هو في النهاية رهن
لتطور الذوق الغنائي والموسيقي، وظهور أشكال جديدة ثورية ترفضها حتى الآن الأذن العربية؟

وددت أن أنوّه في هذا الصدد إلى تجربة فريدة وجميلة لم أكن على اطلاع كاف عليها لولا أن 
شاهدت صدفة بالأمس ريبورتاجا ً مطوّلاً عنه، ثم بحثت في الانترنت، فوجدت ما أدهشني ولربما 
أدهش من لا يعرف هذا المبدع: عابد عازريه

روابط ذات صلة بالموضوع
دفاعاً عن المحكية - سليمان الأوزاعي
المغايرة والاختلاف في الشعر المحكي لدى ميخائيل عيد
جوزف حرب في "سنونو تحت شمسية بنفسج" - محمد علي شمس الدين
لقاء مع الشاعر عصام العبد الله

رقص

2005-09-13T12:13:00.000-02:00

مو معصمك لأ شي إله من السِّكِر دودَخ م َ يترنَّح وِعَ إصبعو راسي مَ يتمرجح ناطر أنا ت كفّك يزتِّ الزّهر يا بترفعيني ع السما يا بتشلحيني ع الجمر *** حبّة مسك خلّيني سرسب من دفا جيدك ع كتفك ع الصدر يرميني نهدك ع الخصر.. عجِّل هدّي ع تلّ من السّحِر إحتار لو كمِّل إحتار لو إرجع قضِّي مع "الضُم ضُم" شي برمة خصر أوّل ما ينقر "تك" إتلاشى *** إبهام إجرِك يرسم مواج البحر ويهيم باللوحة تتمايلي تصطف ع زنودك طيور مشكّلة تشرب عرق جسمك خمر *** بين الندى والليل في صحبة عمر شو تمشوروا بشعرك سوا جنّ الشعر لزّق ع خدّك بوّسو وانسلّ ع الشفّة خصلات بدّون يلحقوا مهبّ الهوى وخصلات بيحبوا الأسِر

بعد الصخر

2005-09-10T12:18:00.000-02:00

استمع إلى تسجيل صوتي للقصيدة

بعْد الصّخِر بكتير.. ودّاني درب جرْوَح بَطِن كفّو الدّهِر غِلّيت بالغاب وتهت..

* * *

مشِّي معي، بوغْنان، ت نحوِّش عِطِر ت نعفِّر الدوّام، نشويه المسا نحنا ومَ نطحن ذاكِرة للريح، ونْحمِّص ع هالصّوبا شِعِر
* * *
نَفْنَفْ على كْتافي الشِّتي خشخش تحت إجري الوَرَق عربش على تميّ العسل غطّ الحجل يشرب نَبِع كفيّ
* * * واوي ورا الدّيسة نبق
حََرْكَش ت قفّطّني
هرِّ الورد منِّي
هجّ الحجل عنِّي
زمّو
و
و
و
و
ر
فيّقِني
* * *
لأ مو حلم
وقِّف ت نحكي شويّ
قِد لو حلم
شو وصّلا
يا صاحبي
ع جيبتي
هالكمشِةِ قْرون جْدَيّ
====
غليت: دخلت
نفنف: هطول المطر الخفيف
بوغنان: زهر بري
نحوِّش: أي نقطف أو نجمع
الدوام: وهو ثمر البلوط، وهو لذيذ الطعم في جزئه المتصل بالشجر، وباقيه مر، وغالباً ما يؤكل مشوياً لتزول مرورته
الصوبا: المدفأة وسط الغرفة أيام الشتاء، وغالباً ما تعمل على المازوت
خشخش: أصدر صوتا كصوت الحبيبات ضمن الوعاء
عربش: تسلّق
غط: هبط، وتقال عن الطائر
واوي: وهو الثعلب
الديسة: شجر شوكي بري
نبق: ظهر بغتة
حركش: أصدر ضوضاء
تَ: حتى
قفطني: أي باغتني، أصابني بالذعر أو بالمفاجأة
هرّ: سقط
هج: رحل
قِد: ابتدائية في لهجة المنطقة
كمشة: قبضة أو كمية صغيرة
قرون جدي: نبات بري من البقوليات، صغيرالحجم، ينمو بجانب الصخور في الأماكن الظليلة والرطبة

هدّي يا هالإيام

2005-09-09T10:15:00.000-02:00

هدّي يا هالإيام... لا تركضي فيّي خايف لَ شمسي تنام... ما تشرق عليّي هدّي ت قضّي نهاري عم غنّي هدّي ت خلّي مسكني جنة هدّي ت ترويني حبيبتي وترتوي مني هدّي ت شوف زغيري عم يكبر هدّي ت ضمّو وبوّسو أكتر هدّي ت إرجع بالعمر متلو صبي زغيّر هدّي ت مرّ نهار ع إمي طعمةّ عروس السكّر بتمّي هدّي ت حوّش من حضن ورداتا شي ضمّة هدّي ت ستّي تكمّل القصّة بين الحرف والحرف في غصّة هدّي ت أعرف جدّي يوم الغاب شو وصّى هدّي ت زور الصخرة مع بيّي عرِّج ع درب حجارو مدريّة إركع ت كفّو تعطِّر الوردات حِنِّيّة هدّي يا هالإيام... لا تركضي فيّي خايف لَ شمسي تنام... ما تشرق عليّي

زمقاع

2005-09-06T10:30:00.000-02:00

الصورة استعرتها مع الشكر من موضوع جميل هنا والزمقاع هو حشرة الزيز قصة الزمقاع معنا، نحن الصبية، كانت مؤلمة، فهو حشرة رائعة الجمال ذات رأس ذهبي، كنا نسرقه من الشمس ونضعه في علبة كبريت، ثم نعلقه من رقبته بخيط ونتركه يطير لنستمتع به، إلى أن يموت بعد قليل - مع الأسف الشديد -ذلك الصبي يمارس عليّ اليوم نفس الهواية الشيطانية مسلوخ عن حلمي فقت كل اللي علّق بالدّبِق زِمْقاع بعد الشمس والفيّ والنسمات عصّوا دهب راسو ببرد علبة وبخيط علّق رقبتو بإيدو الطفل لعبة كلاّ عصر يمكن شي كمشة ليل وبيسكت جناحو الورق وبيزعل عليه الصبي وبينام وبيحلم

رحيل

2005-09-05T15:54:00.000-02:00

غزّ العَلَم بالتلج، ما ارتجّ الضّجَر

مرّه بعد مرّه انقهَر

لفّ الهوى بْكوفيِّتو الحمرا

نشّب ع عين الشمس بجناحو الشمِع

والبيّ شردق بالدمع

======

غزّ: غرز

نشَّب: طار كالسهم

شردق أو تشردق: عندما تدخل اللقمة (أو الدمعة) خطأً في مجرى التنفس

قضوضة الزعتر

2005-09-04T22:42:00.000-02:00

نص السما رْمادي نص السما أبيض والورق مالو عرْق يرقص دواير ع الشجر، ميّت وبْسينه جوّاتو جوّه الرسم قاعد صبي براسين غافي بفيّ التين تمّو مجلغم من أتر قضّوضة الزعتر تارك لبكره أطيب القضمات فاق الصبي سمسم ع إجر بسينتو اللي فوق والريح طفشت بالخبز والمشهد تشربك والمشهد تحرّك

=====

عرق الورقة هو الساق الذي يصلها بالغصن

بسينة: قطة

تمّو: فمه

مجلغم: متسخ أو ملطخ بشكل فوضوي

قضوضة: صندويشة ... أو الشاطر والمشطور..الخ

الزعتر: هو نبات بري يصنع منه بخلطه مع السمسم والسماق، ثم يرش ضمن القضوضة، ليأكله الأولاد بعد دهن الخبز بزيت الزيتون

تشربك: اختلط

هروب غير موفق

2005-09-04T22:40:00.000-02:00

أنا رايح لا تشتقلي لا تغمزلي لا تغريني بقوافي ما إلا شغلة ولا عملة خلص ما عد بقى في شي خرج ينقال لشو يا حرفي تتلغبص بهالموّال كلام الإنس مو شغلي كلام الجن أهين لي إذا الركبان ما بقّوا إلك معنى لشو المعنى كلام الغيب أهين لي كلام بيرسم الكلمة بألف معنى وبلا معنى

تشكيلات

2005-08-30T23:27:00.000-02:00

رسالة من الجنة

2005-08-26T13:17:00.000-02:00

بتذكّرِك يا غربة الأحلام

كل ما البحر غسّل ملح جرحي بملح

بتذكّرِك

همس الشتي والجاز ومْواج الهدير

غلّوا سوا بدمّي

والكف خربش ع الورق

والخربشات تشكّلوا

موج وصدف

لما الحلم ملّ السكن

هجّوا اللي كانوا يخيّطوا حكايات

واستسلم التنّين للشاطر حسن

خلصوا الأحاجي وْهَي

قاعد م إسمع جاز قدامي الشتي

ما عاد خربش ع الورق كفّي

غطِّ الحلم

هجّ الحكي

====

هج: رحل

غط:هبط، وتقال عن الطائر

ضاع المهد؟؟

2005-08-13T23:34:00.000-02:00

برّه المهد وشوش حدا يمكن أنا.. يمكن صدى معقول إزرع بالفلا وكفّي أرِض معقول يسقيني الطمي وبزّ المدينة طايف بتمي عسل وِعْيون أصدق من أغاني المهد تغزلني أمل فستان أبيض من صباح الفل والزنبق معقول ما إعشق متلي أنا بيعشق عشقي بيتصدَّق بس العشق غيّة شو عرّفك ما تكون جنيّة من هالحكايا النايمة بحضن المهد تخنق حنينك والوعد وشوش حدا ضاع المهد بعدو حدا وشوش حدا ضاع المهد ضاع المهد وشوش ت خزّق مسمعي ردّ الصدى وِبْلحظتا دقّ المطر: - ضاع المهد؟؟؟ - ما ضاع يا بْنيّي - مو شايفو!! - ليكو، ليكو ببطن كفّك

نص كاسي المنتلي عشق وضنا

2005-08-11T10:58:00.000-02:00

نصّ كاسي المنتلي: ساعة هَنا واللي فاضي برسمو نصّ كاسي المنتلي: عشق وضنا واللي فاضي بحلمو نصّ كاسي المنتلي: كلمة صديق نصّ كاسي المنتلي: قلبي البريء نصّ كاسي المنتلي: ضوّ الطريق واللي فاضي.. واللي فاضي.. واللي فاضي... بكتمو *** يا شمس بكره اوعديني بالندى يبلّل حنيني بالبيادر من يميني بزرعي يضحك موسمو نص كاسي المنتلي: عشق وضنا واللي فاضي.. واللي فاضي.. واللي فاضي... بحلمو *** كاسي حلاّها زماني بالورود اللي هداني بيتي غنّى بالأماني والبشاير نسّموا نص كاسي المنتلي: عشق وضنا واللي فاضي.. واللي فاضي.. واللي فاضي... بحلمو *** يا صديقي ضوّي قلبي بالسّنا ترشّو ع دربي صوتك الدايب محبّة لنهاري.. مبسمو نص كاسي المنتلي: عشق وضنا واللي فاضي.. واللي فاضي.. واللي فاضي... بحلمو

التمثال

2005-08-02T13:47:00.000-02:00

جوّه البَحِر شو في مَوَاويل وشِعِر شو في عرق شو في صَبِر شو في مراكب تَوَّها حِزن القمر شو في حكايا جرَّحا برد السّفر شو في بشر ملّوا السّهر ناموا بفيّ الليل يستنّوا القدر *** ما في بْحلاها كان هاك السفينة الضاع رسما من الزمان أحلى ما فيها ع البرج تمثال مدري من المرمر مدري شغل صلصال ما بينوصف مهما خيال الشاعر يودّي ما بيقدّي وصفو وِقِف حدّو الشعر ما في شعر ينقال *** قالوا اللي صنعو كانوا فنانين كانوا نوابغ كانوا خلاّقين قعدوا ليالي يشكّلوا الأشعار بالصلصال ويكوّنوا الأنغام بالمرمر حِكْيوا بَعِدْها الناس إنو الرب رشرش قِدِرْتو ع الحجر نزّل ملايكتو وأمر حطّوا بقلب المرمراية قلب *** وهيك اللي صار وكان هاك السفينة الضاع رسما من الزمان كِمْلت بحسنا وْصارِتِ مْحَطّ النظر ما في بجمالا عين شافت.. والقمر ودّى رسايل ضوّ من قلبو لهالتمثال المتل الشِّعِر يضحك مع الغيمات ويغازل النجمات ويحكي مع الشَّمس الوليدة أجمل حكايات *** وبليل ما بيعرف قَمَر هاج البَحِر كسَّر شراعات الصَّبِر والخوف كشًّر.. بيَّن نْياب الغَدِر والموت زَحْلف ع العِمِر *** دبّ الهلع بين البشر والموت عربش ع القدر صرخوا البشر: قبطان نجّينا!! قبطان قلبو من حجر خاض بمعارك وانتصر قال لون يا بحارة اصمدوا قوموا معي يا رجال ت نكسّر التمثال زتّوا الحجر للموج زتّوا الشعر زتّوا الفرح والحزن خلّوا الوحوش تكنّ *** وهيك اللي صار وكان وصارت سفينة غاب رسما من الزمان بقلبا بشر يمكن بشر ملّوا السّهر ناموا بفيّ الليل يستنّوا القدر

حكاية تحدث كل يوم

2005-07-26T16:24:00.000-02:00

منذ حوالي أربع سنوات، كنت أعمل كاستشاري برمجة في شركة اتصالات كبيرة. بعد أيام من بدء المشروع، فوجئنا بوجود شخص عريض المنكعين شلولخ، يجلس بشكل دائم

وراء حاسبه الشخصي، قريباً من القطاع الذي يعمل فيه فريق عملنا، ضمن الصالة الضخمة. لم نكن نعلم إن كان هذا الشخص من فريقنا أم لا، ونادراً ما كان أحد من مدراء ومسؤولي

المشروع يسأله عما يفعل، واستمر الأمر على هذا المنوال لعدة أسابيع، إلى أن فاجأنا

أحد المشرفين على المشروع بأن عريض المنكعين إياه سوف يعطينا محاضرة

في أساليب ضمان كفاءة منتجنا البرمجي!! بعد إظهار دهشتنا وفضولنا، أخبرنا المشرف إياه أن فابيانو (وهو اسم الشلولخ) يعمل معنا

في المشروع منذ عدة أسابيع، وأنه منكبٌّ مذّاك على دراسة موضوع ضمان الكفاءة البرمجية!!!! المهم، أتت المحاضرة، وكانت فضيحة بجلاجل، أخطاء بالجملة، كلام شخص لا يعرف

من البرمجة وعلومها الحد الأدنى. أصدقائي البرازيليون، المهذبون جداً على فكرة، أبدوا ردود

فعل خجولة إزاء تخبيصات الأخ، أما أنا فلم أتوان عن السخرية منه مباشرة، وفي لحظتها!! من يومها، أصبح فابيانو نكتة الموسم لدى أفراد الفريق العامل في المشروع، ولكن مشرفي

المشروع استمروا في تشغيله، وبراتب أعلى من جميع العاملين!! استمر هذا الأمر حوالي ثلاثة أشهر، وشيئاً فشيئاً، بدأ نسيمات العقل تهب على رؤوس مشرفي

المشروع، وأدركوا أن هذا الشخص لا يقدم شيئاً على الإطلاق للمشروع، وزاد في هبوب

النسيمات تململ الفريق من وجود هذا الشخص، ولكن هذا لم يجعل مشرف المشروع يصرفه،

بل أنه فضّل أن يوكل إليه مهام بسيطة في البرمجة!! هنا بدأ مسلسل المفارقات الضاحكة، الرجل لا يفقه ألف باء البرمجة!!! أصبح مضرب الأمثال

لدينا حتى أن اسمه الاختصاري في الشبكة (فرنيك) أصبح مرادفاً لذلك الشخص المتطفل على

المهنة، بل أننا اقترحنا إضافة الفعل(Farnicar)

إلى اللغة البرتغالية كدلالة على النصب على رب البشر والتطفل على مهنة الانفورماتيك!! المهم، استمر الحال هكذا بضعة أشهر أخرى قبل أن يقرر مدير المشروع صرفه من العمل،

يومها كان صاحبنا قد حصل على وظيفة بأجر أعلى في Ericsson،

علمت لاحقاً أنه لم يستمر فيها إلا بضعة أسابيع، قبل أن ينتقل إلى شركة أخرى كبيرة،

وهكذا دواليك!!! اليوم، أتت من جديد سيرة هذا النصاب، لقد افتتح موقعاً ومدرسة من بتوع الروحانيات!!! يدعي في موقعه أن يشفي الأمراض، ويحل العقد، بالإضافة إلى إعطاء دروس ومحاضرات

بهذا الشأن!!! هاهو موقعه!!

خلص الزعل

2005-06-21T10:41:00.000-02:00

خلص الزعل نزل القمر شلال يغمرني بالورد يغسلني رجع العطر بالليل ينطرني بسمة على شفاف الصبح بالشمس توعدني بقطر الندى باللون بزهور الأمل خلص الزعل يا قلب.. إي خلص الزعل خلص الزعل صار المسا أحلى صار العمر أغلى حدّ السما أعلى عمري، بعد مرة، ابتدا قدّامي شو امتدّ المدى رجع المجد للحب لبيوت الغزل خلص الزعل يا قلب.. إي خلص الزعل خلص الزعل ما عاد إرضى يعتّب بداري دار الفرح داري هجّت طيور العشق من صدري وغطّت على صدرك غنى الهوى من جنون أسراري غنى الهوى وانزاح عن قلبي الوجل خلص الزعل يا قلب.. إي خلص الزعل

إليك يا مصر، إليكم يا صنّاع النور

2005-06-08T15:44:00.000-02:00

"أنا ابني كان شبهكم، كان أسمر زيكم".... أم نور

مرق طيفك حضنّي... رسم حلمي الندي أنا الشامي وندايي... على أرضِك غدي

أنا الشامي وحنيني... لأرض النيل يحكي لرفقة حملوا همّي... لإم زغيرا تبكي

أنا الشامي ويقيني... شمس غدّي بيمينك فجر لوني رسمتي... عتم دربي أنينِك

يا سمرة لو عطشتي... جذورك مدي فينا أنا الشامي وبغنّي... لأحلى بكره لينا

عندما يقرأ نبيل مرآة نفسك

2005-06-06T14:36:00.000-02:00

من الشاعر الصديق فوزي غزلان، كتبها في منتدى مدن

شرف لي أن يجتهد شاعر وناقد بهذا التحليل الدقيق لكتاباتي، وهي شهادة سأعتز بها ما حييت علي الرقماني / نصفُ الإلـه لسـتُ أفهم في فنّيات شعر العامية ، لكنّـه ينسـابُ إلى دمي نشوةً /مثلُ حشيشٍ زهرة ........فكيفَ وإنْ جاءَنِي من شـاعرٍ مثلُ علي الرقماني ؟؟...... وعلي شـاعرٌ يُتقنُ حتى اختيارَ حرفِ رويـهِ فيناسب موضوعـه ليبلُغَ العمقَ فيـنا . ذلكَ يدفعُنِي إلى سـطوحِ الفضاءِ تفاعلاً وانْتِشـاءً فأتذوّقَـهُ حتى البكاء / ثم حتّى نشوةِ العنـاقِ بعدَ تيـه ........... لم يتركْ علي غرضاً إلاّ وكتب فيـه . الحبّ ، الحرّية ، الغزل ، الوصف ، الحزن ، الوجع ، الشوق ، الحنين ، الحرمان ، والوطن ........ أفلحَ فيها جميعها ، بل كانَ فحلاً لا يُقارَع .......... أفلحَ في غنائيتـه وفي شعرية المفردة والعبارة .. فأوصل أكمل الجماليات والـمتع لتحفر في أذواقنا حفرَ الماءِ / فكانَ هو المـاء ........... سـأناجيكَ في صومعتِكَ المُدماةِ - فقط - يا علي ......... أو ربما سأخاطبُكَ فيما لا يدفعُ إلى ابتسامتك ... سأحاولُ الحديثَ إليكَ في بعضٍ ممّا قرأتـه فيكَ ، أو قرأتُـكَ فيـه / فاسـمحْ لي ....... قبل هذا أودُّ أن أفشي إليك هذا السِّـر : قبل طباعة هذه المادّة ، وهي لا تزالُ مسـوّدة ، قرأتُها إلى زوجي وابني . تقطّعت القراءةُ ثلاثـاً / إذْ بكيتُ عندَ ثلاث !!!! عندّ نِهايتها كان بكائي الأخير / ربّما لأنني نبشـتُ فيَّ منكَ ما نبشـت . ربّما لأنني أحبُّك . وربّما للـثَّنـتَين . لستُ أدري ........... " حزني سـرق شمسي يومي صدى أمسي يا عيوني غطِّ الليل شـدّي الغَطا وانسي .... " هل تريدُ الهرَبَ من نفسكَ يا علي ؟؟؟؟؟؟ هل تريدُ تغطيَـةَ ما فيكَ بالنومِ وبدملِ الرّأسِ بالغطاء ؟؟؟؟!!!!! تهربُ من أحلامِ الصَّحوِ إلى أحلامِ الـنّوم ؟ الأخيرةُ أقدَرُ على نبشِ الجوّانيَّـاتِ . وتبقى النّعامَـة ........ كلُّنا يُدرِكُ أنَّ الأحلامَ في مَحروماتِ الرّوحِ و حَرَامَـاتِها ، تُشـقِيها وتُوصِلُها إلى الإعياء : " عَصّ التعب عَ الروح ملأ الحنايـا جروح .... " ولكن ، ربما ، يمكنُ للرّفيقـةِ - إنْ كانت كتفُها صلبةً – أن تدفعَ الآلامَ / ولكن قليلاً فقط ، وهنا قد يصلُ المرءُ لأن يجد دفءَاً في الرِّضى : " ودفّاني الرضى " ... حينَ تقولُ : أنا راضٍ ، كأنّكَ تقولُ : أنا قانع بما أنا عليـه . وشـتَّانَ ما بينَ الـ : قانع والمقتنِع !!!!!!!! ......... لا يمكنُ لمن كان يُغنِّي للشمسِ / وتسمَعه " كنت غنّيلا للشمس وكان الشمس تسمعني " ثم جاءَ الحزنُ فسـرَقَ منه هذه الشمس ، لا يمكن لهذا المغنّي الخاصّ جـدّاً أن يُدفِئَـه الرّضى طويلاً إذا ما دمل الرأسَ بالنَوم .... سـيطلُعُ عليه الصّباحُ / الشمسُ / ليعودَ فيُدرِكَ أنّها لن تَسـمَعَهُ بعدَ اليوم . لأنّ شمسكَ قد سُـرِقَت ، ولأنّ هذه الشمسَ ليست تلكمُ التي ضاعَ عنها في المدى : " الضايع بالمدى " الاسـتمرارُ ذبحٌ باليد . والرجوعُ ذبحٌ بالعودةِ إلى الصّفرِ ، أو ما يقرُبُـه / فلقد أصبحَ : " برّات البيوت " هل تعلمونَ ما ( برَات البيوت ) ؟؟؟؟؟؟؟ نعم ، هي الدنيا تُمطرُ ولكن / أين ؟؟؟؟ لقد كبُرَ وتبدَّلَ المكان / من ملآنٍ إلى فضاءٍ / بلا أرض !!!!!!!!! ثم لمن تُمطر ؟؟ .... " لا أهل ولا بيوت " ، ولا شمسَ تسمع !!!!!!!!!! " هلّق صرت كبير .. والدني م تشتّي .. لا أهل ولا بيوت غنّي غني غني لا شمس تسمعني ولا أرض توسعني " وإنْ تكن هناكَ أرض ، فهي إنما غير هذه الأرض ......... ولا يمكن لتلك الأرض أن تَسَـعَه / لا حيَّـاً ولا بَعد : " لا شمس تسمعني لا أرض توسعني لا بعرف وين بدي عيش ولا وين بدي موت جوات البيوت برات البيوت .. " وتعترف في مكان آخر بأنّ الترحالَ والبعدَ لن يتوقّفَ عندك ، وبأنّ غياب البسمة بفعله ، أيضاً لن يتوقّفَ عند ما فقدتَـه ، ففي " عصفور الجنة " تُقرُّ أنّ المتوالية ستطالُ الأكباد : " يا طفلي بعيونك عم بلمح رحلة بسمة محتارة تهمس لي بكرة رح تهجر ها الوردة وترحل بهالدنيي متلي . " أيّ وجعٍ هذا الذي يمتدّ فينـا !!!!!!!! لم أرَهُ بهذا العمقِ التعبيري البسيط عند أحد .... إنّـها مشاعرُ شاعرٍ يرسمها بريشـةٍ فريدةٍ في رهافتها وفي عمقها البلاغي ........... ها تعيشُ مجاهيلَ الدنيا مخزونةً في نقيِّ عظامكَ يا علي / ولقد سرقك الحزنُ شـمسكَ فباتَ اليأسُ هُوِيَّـةً على جبينك . لكنّه لا يظهرُ إلاّ في مرآةِ روحكَ الحائرةِ بآلامها ، والضائعةِ في المدى ...... ويعكسُ شعرُكَ هذه الدفائن جلـيَّةً لنا فلا تنفعُكَ الجدرانُ ولا الهرب ....... تكابرُ وأنت تنضحُ نزفاً لا يعرفُ رأفةً ولا هرباً / لا إلى ( النومِ ) ولا إلى ( الرضى ) . فهل بمقدورِ الرفيقةِ أن تحملَ كلَّ ذلك فتمحوهُ يا صديقي ؟؟؟؟؟؟....... إنْ كان يمكنُ لأكثرَ - من قصيرِ الوقت – فمن أين ستأتيكَ حرّيـّتُكَ والخيار ؟؟؟ أوَلم تذبلُ الأغنيَّـةُ على الفمِ الذاهلِ يا علي ؟؟؟..... مع كلِّ هذا بقيتَ على عِنْـدِكَ وأغلقتَ البابَ خلفكما هارباً بها من هاتيكَ العيون التي تراكَ من داخلك . فهل الجدرانُ أقدرُ من الصدورِ على إخفاء الواقع النفساني وحقيقة النُّـضح ؟.... لا ، والحقيقةُ هي أنّك تهربُ بها منك الذي يرى حقيقتَه في عيونهم ....!!!! عِندُكَ هو السَّـيّد / وما من غلطٍ في هذا . هي خصيلةٌ من أصيلاتِ خصائل الشاعر الرقيق والشـفّاف .. الشـاعر صاحب الحسّ المرهف / إلى ما فوقَ سَـواترِ الغيم ، حيثُ هو السابحُ أبداً في رحلة البحث عن شمسه التي سُـرِقَت ، وعن أرضه التي غابت ......... ولكن : " شباك الغرفة مفتوح " والعيونُ تدخلُ مثلُ الضوءِ إليك ........ كابر يا صديقي ، فأنا مثلك - أبداً - أكابر .. قاتلْ نزفَكَ .. قاوم بكاءَ روحِك وقلْ لها : " بنودّع أرض بنلاقي أرض والشمس تغيب وتشرق تاني يوم الشمس " واقنِع روحَكَ الجريحةَ وعلِّلها بالأملِ / فلولا الأملَ ما عرفنا ماهيّـةَ الحياة ، ولا عرفنا تلكَ الشمس ولا تلكَ الأرضِ منذ البدءِ يا صاحبي . اقنِعْ روحَكَ وقلْ لها : " وجروح الأمس مع ضوّا تطيب " مع ( ضوّ ) الشمس الجديدة . ولأننا محكومونَ بتناقضاتٍ لا يُتقنُ فنّ محاورتها غيرنا .. ولا تتقنُ اجتياحَ أحدٍ غيرنا ، أقول : لكنها جديدة ، أي غير تلك .. وتلك قديمة سرقتها منك الحياة ، و " الطـيّارة " فأصبحتَ " برات البيوت " .. و " طاير فوق حدود الوقت " . أو ربما كان الوقت خارج حدودك ............. الوقت يهرب . تحاول اللحاقَ ولكن : " قلّ الريش بجناحاتك " وتكالبت عليكَ أحلامُكَ /فلن يُنجيكَ ( شدّ الغطا ) فلقد أصبحتَ " برات البيوت " وغاب عنكَ الدفء حيث : " لا أهل ولا بيوت " وبتَ لا تقدر / لا أنت ولا جدران الغرف / على إزالةِ هذا البرد ، ولا هذا النَّـزف ، وها ينضحُ منكَ فتقول : " لا بعرف وين بدي عيش ولا وين بدي موت " !!!!!!!! وتقول : " بيتي ها الفضا " ...... - أيّ شاعرٍ عظيمٍ أنت يا علي !!!!!!!!!!!! – ولكن يا علي ، أين الأرض في هذا ( الفضا ) . وأين الشمس بعدَ كلِّ غيومِ هذه ( الأحلام ) .. إنك تحاولُ أن تنضحَ نزفكَ منكَ / لكنّـه ينضحك ....... بكلِّ هذا تعترف / وتكابر !!!!؟؟؟؟؟ : تودّعُ قلباً فيحضنكَ آخر / هكذا تدّعي حين تقول : " بنودّع قلب بيحضنّا قلب والعمر قلوب " ولكن يا صديقي ، لا أحد يأخذُ مكانَ أحد . ولا وطنَ بديلاً عن وطن . ولا ماءَ بعدَ الماءِ التي اغتسل بها يومَ وُلِـد / ولا بدّ أن يغتسلَ بها يومَ يموت ......... تلك القلوب التي تحتضنكَ بعدَ القلوب ، وكما تقولُ - أنت نفسك – أيضاً :

"بالليل الساكن ترسم لون" ولهذا ترجِعُ فتُسـعِفُ نفسـكَ بمناجاةِ أبيك / فإليهِ قولُ الحقيقةَ والمآل . هنا - فقط – لا تقدِرُ إلاّ أن تقولَ الحقيقةَ ، حيثُ - في سُـحنَتِهِ - ترتسِـمُ تلكَ الشّـمس ، وفي عينيْـهِ تتلألأُ صورةُ تلكَ الأرض . هو وحده فقط . وأمّا الأمّ فهي ماءُ تلكَ الحقيقة .... لأبيكَ تُفضِي بالحقيقة : " لصوتك مهجتي بتحنّ " " حنيني مو دمع عَ الخدّ " وهنا لا تقدِرُ إلاّ أن تُُسَـرِّبَ إليـهِ وعدَك : " حنيني للسّـنابل وعد حديثك مركبي وشراع وشَـدّة ذاكرة عَ الزّند " ثمّ / آهٍ يا علي ... ثم فيضٌ يأتي يُنبوعاً ماءً / من هناك : " يا بيي ما أخدني النوّ ولا قرّب عَ دربي السّـوّ على جبين العمر مكتوب إلك راجع عَ خيط الضّوّ " وآهٍ أيضاً يا علي ، كأنك تعود لتقول بأنّ ( خيط الضّوّ ) سيتأخر ...........: " وإلاّ بشـي ليلة شتويّة .. ما يرجع هالطير " هل سيطولُ قدومُ ( الضوّ ) يا علي ؟؟؟؟؟؟؟؟؟؟؟؟؟؟؟؟!!!!!!!!!!!!!!!! ـــــــــــــــ 6 / 6 / 2005

رسوم

2005-06-01T10:58:00.000-02:00

نخيـــــل ودم

2005-06-01T06:41:00.000-02:00

ودّع همّ الليــــل ... لفّ حزام الجـــــوع ... وعبّا جيابو وعود من حزن النخيل ... من نوحو الموجوع ... رسّم حلمـو ورود ما صبّح ع الشمس ... لفّ حـــزام الموت ... ع جسمو المهدور عفّن روحـو بأمس ... سكّت فيها الصوت ... وخدّرها بالحــــور من نفس البوابة فاتوا وبنفس الدقيــقة ماتوا

لفّ حزام الجوع وصلّى لفّ حزام الموت وصلّى

من نفس البوّابة فاتوا وبنفس الدقيــقة ماتوا

وداع

2005-05-25T08:52:00.000-02:00

بنودّع أرض

بنلاقي أرض

والشمس تغيب

وتشرق تاني يوم الشمس

وجروح الأمس

مع ضوّا تطيب

* * *

بنودع قلب

بيحضنّا قلب

والعمر قلوب

بالليل الساكن ترسم لون

وتضوّي الكون

نجمات دروب

***

بنودع ناس

متل الألماس

وينك يا رفيق

عيني يخزّق معبدها الدمع

ويدوب الشمع

والكون يديق

نوبة

2005-04-28T11:50:00.000-02:00

لـمـا الحـنـيـن يـطــوف يركـض طـفـل ملـهـوف مــن عـتـمـة الأفكــار بسـطّـر أنيـنـي حـــروف حزني سرق شمسي يومـي صـدى أمـسـي يـا عيونـي غــطّ اللـيـل شـدي الغطـا وانسـي يـــا بــكــره لا تـمـنّــي قـلـبـي شــبــع عــنّــة صفّـى الحلـم كـابـوس والـــذاكــــرة جــــنــــة عـصّ التـعـب ع الــروح مـــلاّ الحـنـايـا جــــروح يـــا رفـيـقـة ضـمـيـنـي خـلـي الغمـامـة تــروح

بيتي هالفضا

2005-04-22T19:17:00.000-02:00

ما بعرف وين بدي عيش عايش بالسما بالعالي كل يوم بلاقي لوحة إرسما طاير فوق حدود الوقت وتاخدني الإيام بجناحاتي قل الريش وماقلوا الأحلام كل العالم عندا بيوت وبيتي هالفضا بيتدّفوا بورقات العمر ودفّاني الرضا سطّرت حروفون ع دربي الضايع بالمدى كل اللي فتحولي بوابون ما ناسي حدا

هالأسمر اللون

2005-04-22T19:15:00.000-02:00

هالأسمر اللون...هالأسمراني تعبان يا قلب خيوه.. والشوقِ أضناني يا سمرة غنيلي ضوي مواويلي من عيني صبيلي كاسك ورا التاني يامِّ الجدايل سود مدي الأيادي جود بحضنك أنا مولود بعدك يا ضيعاني يامِّ العيون الحور ضوّي بقلبي نور لو مهما دربي يدور بتضلّي عنواني يا ليل يا بو الأسرار قلبك هنايي صار جرحي نزف أشعار ت ارتاح شرياني

في عيد ميلاد ولدي

2005-04-22T19:08:00.000-02:00

متل اليوم كانت أول مرة شفتك ع حفّة هالقلب حملتك ع صفحة بيضا صوّرتك والريشة خليتا عندك هاك اليوم لما باطلّع بعيونك وقت اللي بتهدا ع جفونك بسمة تغزل شال النوم قلبي بيهمسلك شو بدي شوفك يا حبيبي قدي يابكره، لو تيجي اليوم بتمر قبالي كم صورة والصورة بتخزّق صورة متل اليوم ال يمحي يوم بحس بعمري تسرسب مني وقلبي بيصرخ لأ ياإبني لا لا تكبر.. لا لا تصدق خليك زغيّر ع قدّك لاتخلي هاللحظة ال تمرق يجرح شوكا الورد بخدك لا لا تخلي اللهفة تسرق تكّة زغيرة بساعة سعدك عيش بقلبك.. عيش بعمرك من هاليوم

مشتاقتلك

2005-04-21T19:20:00.000-02:00

مشتاقتلك بدي شوفك ومابعرف هلق لو شفتك

شو رح تحكي وشو رح قلك يمكن تزعل وتزعلني ومتل الأول ضل اشتقلك رح إحكي من برّه قلبي

لكن صدّقني ان قلتلّك خليك بعيد بهالغربة وخليني وحدي إشتاقلك مشلوحة برات الغفوة دوّر باوراقي عن كلمة دور عن صورة عن رسمة تنسيني إتذكر حبك كل الإشيا بتذكرني بترسم فوق شفافي بسمة حتى البسمة بتعذبني ماالبسمة مرهونة عندك يمكن تسمعني وما تصدق كل اللي عم قولو هلق وتسألني من بعد الفرقة شو اللي فيّقني ع حبك رح قلّك هلق رح قلّك إيام ال قضّيتا وحدي كتبتا ع وراق الرسايل والرسايل ضلت عندي وما بعمرا وصلت لعندك

خربشات على دفتر الغربة

2005-04-12T17:33:00.000-02:00

من المسائل التي تؤرقني هذه الأيام هي هذه الازدواجية التي بدأت ألمسها في حياتي، بين جذوري وفروعي، بين أصولي وحاضري، بين انتمائي بحكم المولد، وحقيقتي الواقعة. الازدواجية عندي هي مرادف النفاق، وكوني أكره النفاق وأدعي أنني شديد البعد عنه، كان لا بد لي أن أبحث عن مصدر هذه الازدواجية؟ المغترب، أي مغترب، يعيش بلا شك ازدواجية ما. تختلف هذه الازدواجية من شخص لآخر، ومن مجتمع لآخر، بحسب طبيعة الشخص نفسه، وطبيعة البلد الذي هاجر إليه. لو نظرنا إلى العرب المهاجرين إلى استراليا والولايات المتحدة لوجدنا أنهم عامة يتمسكون بأصولهم العربية، والعربي المهاجر إلى تلك البلاد يستطيع أن يصل بسرعة أكبر إلى معاهد وجمعيات تحاول مساعدته والأخذ بيده، بينما لا أجد هذا ولن أجده يوماً ما هنا في البرازيل، فالجمعيات هنا رمزية، ولا يأخذها أحد على محمل الجد. إلا أن لهذه الظاهرة وجهاً آخر مؤلم، وهو أن تلك البلدان بالذات (أقصد الولايات المتحدة واستراليا)، وبما أظهره سكانها من مقاومة في تقبل الوافدين من بلدان العرب، دفعت بهؤلاء العرب إلى سلوك هذا النهج، والالتفاف فيما بينهم للحصول على الحماية المطلوبة والقدرة على الإقلاع في رحلة الكفاح والعمل. على العكس من ذلك، ففي بلد كالبرازيل، لا تجد هذه الدوافع، فالتعالي على الجنسيات الأخرى معدوم، بل أنك قد تجد على العكس تماماً، نوعاً من الشعور بالنقص إزاء من يتكلم لغة أخرى أو لكنة غريبة. أذكر أنني في أحد الأيام اتصلت بصديق لي في فرنسا على هاتفه المحمول، وطبعاً بادرت إلى مكالمته بالعربية، إلا أنه فاجأني بأن أخذ يخاطبني باللغة الفرنسية، وشرح لي أنه الآن في اجتماع عمل، وأنه سيخاطبني من البيت بعد ساعة. كما قلت، استغربت تصرفه، ولكنني طبعاً أدركت بسرعة أن حديثه بالفرنسية في ذلك الموضع كان حرصاً منه على مشاعر وفضول من يشاركونه اجتماع العمل، هذا النوع من الحرص يختلف في أوروبا عنه في بلاد أخرى، وأذكر أن أحد السويديين - ممن عملوا لبعض الوقت معي في نفس الشركة - صارحني مرة أنه يستهجن قيام البعض هنا بالتحدث بالبرتغالية في وجوده، وأن مثل هذا التصرف في أوروبا قد يكلف المرء عمله!! أعترف أن ما يجول في خاطري، وأرغب في وضعه في هذا الموضوع، لا يمكن تحديده بفكرة واحدة، إلا أن ما دفعني الآن إلى الكتابة هو سبب محدد: علاقتي مع مدن أرعبتني منذ فترة قصيرة فكرة أن حياتي تسير بي نحو عالم افتراضي لا علاقة له إطلاقاً بواقعي اليومي، هذا الواقع اليومي الذي يتطلب مني تفاعلاً دائماً وحضوراً تاماً، في عملي وتعاملاتي، وقبل كل شيء: أسرتي. أرعبتني فكرة أن سعادتي الصغيرة التي ألهث وراءها خلال نهاري هي في عالم افتراضي لم أكن لأرضى به، أو لأغرق فيه لو لم يحمل لي ما فقدته في الحقيقة: لساني ولغتي وذكرياتي، وقبل كل شيء: أمنياتي وأحلامي التي تركتها تموت حصرماً على عناقيدها اليائسة. أرعبتني فكرة أن جل من أسعى للقائهم والتحدث معهم، وأنشد عندهم دواء جراحي اليومية، هم أشخاص افتراضيون، لو أنني التقيت بهم أيام كنت في دمشق، لأعرضوا عني، ولأعرضت عنهم، ولربما في أفضل الأحوال إن تعارفنا ما كنا وجدنا حديثاً واحداً مشتركاً. في العالم الافتراضي، كل الاشعار جميلة، كل الأفكار خلاقة، كل النجاحات الصغيرة منجزات خرافية.. لكن العالم الحقيقي أقسى وأشد رتابة ومللاً. هذه الأيام، أشعر فعلاً أنني مهاجر أكثر من أي وقت مضى، والسبب هو أنني عدت عبر هذا العالم الافتراضي الملعون إلى عالم فررت منه هائماً على وجهي، عالم كم أرهقني ووضع فوق كتفيّ أحمالاً من أخطاء مصيرية ارتكبتها مخيّراً أم مسيّراً، عدت بعد أن كنت قد بدأت أجني ثمار مشواري الجديد، مشواري الذي ضمن لي حلماً طالما داعب مخيلتي: نقطة صفر جديدة لا يؤرقني كثيراً شأن عدم تعلم أولادي للغة العربية، مع أنه يحز في نفسي ألا يقرؤوا ويفهموا ما كتبته لهم وعنهم.. أن يحادثوا أهلي وأخوتي، ويرووا فضولهم لمعرفة الأرض التي شهدت مولدي وطفولتي وشبابي. لا يؤرقني هذا الأمر، وتبريري الجاهز هو أنني حصرت اهتمامي في أن يتلقوا تربية وتعليماً حقيقياً أولاً.. أن يمارسوا حياتهم بطبيعية، وأن أستكشف معهم - دون أي قسر - ميولهم وتطلعاتهم.. كل هذه الاهتمامات لا تتطلب تعلم اللغة العربية التي لا يربطهم بها سواي.. أشعر بالأنانية إن أسرفت في هذا الأمر!! لا أريد أن يفهم كلامي أني نادم على الغربة، فهي كانت ضرورة وجودي، وفيها استعدت احترام ذاتي، وحققت جزءا لا بأس به من طموحاتي، الا أنها في النهاية تجربة انسانية أحب أن أشارك بها آخرين، لأستفيد ويستفيدون، وهذا هو غرضي من الكتابة هنا، ومن أي تواصل أقوم به من أي نوع.

اشعار بالعامية

2005-04-11T13:14:00.000-02:00

عصفور الجنة

2005-03-17T15:07:00.000-02:00

ولإني متلك يا عصفور الجنة بالأحلام جناحي محني بحس بحالي قد العالم والعالم شو أكبر مني شو بدي لما ع شباكي تهدي قدِّملك من قلبي وردة تسقيك الوردة دماتا وجناحاتك تهدى عندي يا طفلي بعيونك عم بلمح رحلة بسمة محتارة تهمس لي بكره رح تتركلي الوردة وترحل.. بهالدنيي متلي